بھارت کا اصلی چہرہ
شیئر کریں
شاہد اے خان
سرسبز پہاڑوں پر چناروں کے درمیان بہتے پہاڑی چشمے، کشمیر کی جنت نظیر وادی اپنی خوبصورتی میں بے مثال ہے،اس حسین وادی میں گنگناتی ندیاں ہیں چہچہاتے پرندے ہیں، سربلند سرسبز پہاڑ ہیں فطرت کی خوبصورتی اس وادی میں اپنی تمام تر رعنائیوں کے ساتھ پورے جوبن پر نظر آتی ہے۔ کتنی تازگی ہے کتنا سکون ہے۔ لیکن یہ سکون وہیں ہے جہاں انسان نہیں بستے کشمیر کی مقبوضہ وادی میں جہاں انسان بستے ہیں وہاں بھارتی فوج کی درندگی نے انسانیت کو بھی شرما دیا ہے۔مقبوضہ وادی میں کشمیریوں کے بنیادی انسانی حقوق سلب کر لئے گئے ہیں صدائے احتجاج بلند کرنے پر پابندی ہے۔ پہرے توڑ کر احتجاج کے لئے سڑکوں پر نکلنے والے آنسو گیس اور گولیوں کا نشانہ بنائے جاتے ہیں۔ معصوموں کے چہروں کو پیلٹ گن سے چھلنی کر دیا جاتا ہے۔
منظر بدلتا ہے لائن آف کنٹرول پر بھارت کی بلا اشتعال جارحیت آئے روز کی کہانی ہے۔ بھارتی فوج ایل او سی کے پار آزاد کشمیر میں گولہ باری کرکے شہریوں کو نشانہ بناتی ہے، بھارت کی بلا اشتعال کارروائیوں میں ہمارے جوان بچے بوڑھے اور خواتین نشانہ بنتے ہیں۔ ہمارے جوان جام شہادت نوش کرتے ہیں۔ پاک فوج کی جوابی کارروائی سے دشمن کی توپیں خاموش کروا دی جاتی ہیں لیکن زخم چاٹتا بھارت باز نہیں آتا۔ امن بھارت کو راس ہی نہیں آتا۔ کشمیر میں امن کی فاختہ بھی بھارتی گولیوں کا نشانہ بن چکی ہے۔
سوچنے کی بات ہے اقوام متحدہ ہر سال اکیس ستمبر کو عالمی یوم امن مناتی ہے لیکن یہی اقوام متحدہ مقبوضہ کشمیرمیں بھارتی جارحیت کے خلاف ایک لفظ منہ سے نہیں نکالتی۔ اس یوم امن پر بھی بھارت کی جانب سے ورکنگ باؤنڈری پربلا اشتعال فائرنگ سے چھ پاکستانی شہری شہید اور تئیس زخمی ہو گئے۔ عین عالمی یوم امن پر ہونے والی اس بھارتی اشتعال انگیزی کا اقوام متحدہ نے کوئی نوٹس نہیں لیا اور نہ ہی امن کا راگ الاپتے مغربی ملکوں نے اس بھارتی کارروائی کی مذمت کرنا ضروری سمجھا۔ ویسے بھی کشمیر میں رائے شماری کی قراردادیں کتنی دہائیوں سے اقوام متحدہ کا منہ چڑارہی ہیں، عالمی ضمیر کو کچوکے لگا رہی ہیں لیکن اقوام متحدہ اور اقوام مغرب خواب غفلت سے جاگنے کا نام ہی نہیں لیتے۔
اقوام متحدہ میں پاکستانی مندوب ملیحہ لودھی نے بھارت کا حقیقی چہرہ دنیا کو دکھا دیا جنرل اسمبلی میں انہوں نے کہا بھارت جنوبی ایشیاء میں دہشت گردی کی ماں ہے۔انہوں نے کہا کشمیر بھارت کا حصہ نہیں ہے بلکہ اس پر بھارتی قبضہ غیر قانونی ہے اور یہی نہیں بھارت کا حکمران گجرات میں مسلمانوں کے قتل عام میں ملوث رہا ہے۔ انہوں نے کہا کہ بھارت دہشت گردی کو ریاستی ہتھکنڈے کے طور پر استعمال کر تا ہے۔انہوں نے عالمی برادری پر زور دیا کہ وہ بھارت کو سیز فائر کی خلاف ورزی سے روکے۔ بھارت پاکستان کے اندر دہشت گردی میں بھی ملوث ہے۔ طالبان سے بھارت کا کٹھ جوڑ اور بلوچستان میں دہشت گردوں کی سپورٹ بھارت کا چہرہ بے نقاب کرنے کے لئے کافی ہے۔ طالبان سے بھارت کے تعلقات کا بھانڈا تو اب خود بھارتی میڈیا پھوڑ رہا ہے بھارتی اخبار ہندوستان ٹائمز نے اعتراف کیا ہے کہ بھارتی خفیہ ایجنسی را اور کالعدم تحریک طالبان پاکستان کے آپس میں گہرے تعلقات ہیں اور اس حوالے سے امریکا کوبھی شدید تحفظات ہیں۔اخبار کے مطابق ان تعلقات پر امریکا نے بھی تشویش کا اظہار کیا ہے اور بھارتی خفیہ ایجنسی اور ٹی ٹی پی کے تعلقات کم کرنے کے لئے بھارت پر دبا بڑھانا شروع کردیا ہے۔ را اور ٹی ٹی پی کا گٹھ جوڑ امریکی ایجنڈے پر ہونا پاکستان کے دہشتگردی کے خلاف موقف کی تائید کرتا ہے۔ بھارت پاکستان کی جانب سے ثبوت پیش کیے جانے کے باوجود دہشتگرد کالعدم تنظیموں سے اپنا تعلق ختم نہیں کر رہا جس کا نتیجہ پورے خطے میں عدم استحکام کی صورت میں نکل رہا ہے۔
