عمرا ن خان کو نفسیاتی مریض قرار دے کر نااہل کرنے کا منصوبہ
شیئر کریں
لاہور(رپورٹ:رانا خالد قمر)سابق وزیراعظم عمران خان کو قومی نفسیاتی مریض قرار دے کر وزارت عظمی کے لیے نا اہل کرنے کا منصوبہ۔ ن لیگ نے سابق وزیراعظم عمران خان کا مقابلہ کرنے کے لئے نفسیاتی ماہرین کی ٹیم بلا لی۔ غیر ملکی نفسیاتی ماہرین کی ٹیم 3 ارکان پر مشتمل ہے۔ عمران خان ایک غیر ملکی کمپنی کی مدد سے 4 سال سے سائکو پیتھک مینوپلیشن طریقہ کار سے نوجوانوں کو راغب کرنے میں مصروف تھے، رپورٹ میں انکشاف ۔ تفصیلات کے مطابق ن لیگ نے سابق وزیراعظم عمران خان کے آئے روز بدلتے بیانات ۔ یو ٹرنز اور ان کی غیر متوازن شخصیت کو سامنے رکھتے ہوئے نفسیاتی ماہرین کو عمران خان کا تجزیہ کرنے کا ہدف دیا۔ ابتدائی طور پر ڈنمارک میں مقیم ایک پاکستانی عامر شہزاد کی خدمات حاصل کی گئیں جو ان کے حوالے سے پہلے کام کر رہے تھے اور ان کا ایک آرٹیکل بھی ایک غیر ملکی میگزین میں چھپ چکا تھا ۔ عامر شہزاد نے ڈارک ٹرائڈ آف پرسنیلٹی کا تجزیہ کرتے ہوئے رپورٹ دی کہ عمران خان خود پسندی، خود نمائی، انا پرستی، ہٹ دھرمی، جھوٹ اور بہتان تراشی جیسی سنگین امراض میں مبتلا ہیں۔ انہوں نے انکشاف کیا کہ وہ اپنا ایجنڈا نافذ کرنے کے لیے گزشتہ 4 سال سے برطانیہ کی ایک کمپنی کی مدد سے پاکستانی قوم بالخصوص خواتین اور نوجوانوں پر اثر انداز ہونے کے لیے کام کر رہے ہیں، وہی کمپنی انہیں ہر موقع کی مناسبت سے ایجنڈا تخلیق کر کے دیتی ہے، بتایا گیا ہے کہ اس کمپنی میں زیادہ تر شئیرز کے مالکان یہودی ہیں جبکہ عمران خان کے سابق برادر نسبتی زیک گولڈ سمتھ بھی اس میں حصہ دار ہیں۔ رپورٹ میں بتایا گیا کہ دنیا بھر میں اب تک پانچ ایسے حکمران یا شخصیات گزری ہیں جن میں یہ سب بیماریاں موجود تھیں ان میں سے ایک کو پھانسی پر لٹکایا گیا جبکہ باقی چاروں شخصیات نے خود کشی کی۔ اس ابتدائی رپورٹ کے بعد ن لیگ نے ایک اہم یورپی ملک کے نفسیاتی ماہرین کی خدمات حاصل کیں انہیں کیس اسٹڈی کے لیے مواد بھیجا گیا، انہوں نے بھی اپنی رپورٹ میں عمران خان کو نفسیاتی مریض قرار دے دیا جس پر ن لیگ نے ان ماہرین کی ٹیم کو پاکستان بلایا، وہ گزشتہ دو ہفتوں سے یہاں موجود ہے، وہ نہ صرف عمران خان کو "آبزرو” کر رہے ہیں بلکہ وہ ان سے متاثر ہونے والے ان کے حواریوں، فالوورز، سپورٹرز اور قریبی ساتھیوں میں اس مرض کو پھیلنے سے روکنے کی تجاویز بھی تیار کر رہے ہیں۔ اطلاعات کے مطابق مذکورہ رپورٹ پارلیمنٹ میں پیش کیے جانے پر غور ہورہا ہے،جہاں منظوری کے بعد عمران خان کو قومی نفسیاتی مریض قرار دے کر انہیں آئندہ کسی اہم عہدے کے لیے غیر موزوں شخصیت کا سرٹیفیکیٹ جاری کیا جائے گا۔
