سیلاب سے تباہ شدہ مکانات کے مالکان کو نئے گھر بنا کر دینے کا فیصلہ
شیئر کریں
شوکت یوسفزئی کے کینسر علاج کیلئے 2 کروڑ روپے کی منظوری ، لائیوا سٹاک کے نقصانات کا معاوضہ دیا جائے گا
جن کے کاروبار متاثر ہوئے ہیں، انہیں بھر پور پیکیج دیا جائے گا،گنڈاپور کی زیر صدارت صوبائی کابینہ کا اجلاس
خیبرپختونخوا حکومت نے سیلاب سے تباہ شدہ مکانات کے مالکان کو نئے گھر بناکر دینے کا فیصلہ کیا ہے۔وزیراعلیٰ خیبرپختونخوا علی امین گنڈاپور کی زیر صدارت صوبائی کابینہ کا اجلاس ہوا جس میں سیلاب سے شہید ہونے والوں کی درجات کی بلندی کے دعا اور فاتحہ خوانی کی گئی۔اجلاس میں پی ٹی آئی کے رہنما اور سابق صوبائی وزیر شوکت یوسفزئی کیلئے کینسر علاج کے لیے 2 کروڑ روپے کی منظوری بھی دی گئی۔کابینہ کو سیلاب سے ہونے والی نقصانات، ریلیف اوربحالی کی سرگرمیوں پر تفصیلی بریفنگ دی گئی۔ اجلاس سے خطاب کرتے ہوئے علی امین گنڈاپور کا کہنا تھا کہ جن جن کے گھر تباہ ہوئے ہیں، انہیں گھر بنا کر دیں گے جب کہ لائیو سٹاک کے نقصانات کا بھی معاوضہ دیا جائے گا اور جن کے کاروبار متاثر ہوئے ہیں، انہیں بھی بھر پور پیکیج دیا جائے گا۔حالیہ سیلاب میں ضلعی انتظامیہ اورریسکیو اداروں نے بہترین ریسکیو آپریشن کیا، دیگر تمام متعلقہ محکموں اور اداروں نے بروقت اور بہترین رسپانس دیا، بہترین کارکردگی پر تمام ادارے اور محکمے تعریف کے حقدار ہیں۔انہوں نے کہا کہ پہلے مرحلے میں ریسکیو آپریشن مکمل ہوگیا، تاہم لاپتا افراد کی تلاش جاری ہے، شہداء کے اہلخانہ اور زخمیوں کو معاوضوں کی ادائیگی جاری ہے، متاثرین اطمینان رکھیں، سب کو معاوضے ملیں گے، کوئی بھی محروم نہیں رہے گا۔متاثرہ علاقوں میں مراکز صحت کو فوری طور پر فعال بنایا جائے، ان مراکز صحت ضروری ادویات کی دستیابی یقینی بنائی جائے، ان علاقوں میں موبائل ہسپتالوں کی دستیابی بھی یقینی بنائی جائے۔وزیر اعلیٰ خیبر پختونخوا نے کہا کہ متاثرہ علاقوں میں وبائی امراض پھیلنے کے ممکنہ خدشے کے پیش نظر پیشگی احتیاطی تدابیر اپنائی جائیں، ان علاقوں میں مال مویشیوں کے لیے چارہ کی فراہمی، انہیں بیماریوں سے بچانے کے لیے بھی اقدامات کیے جائیں۔متاثرہ علاقوں میں مکمل صفائی کیلئے خصوصی مہم شروع کی جائے، سیلاب زدہ علاقوں میں پینے کے پانی ٹیوب ویلز وغیرہ کو جلد بحال کیا جائے۔اجلاس سے خطاب میں علی امین گنڈا پور نے کہا کہ ان علاقوں تک تمام رابطہ سڑکوں کی بحالی کے کام کو تیز کیا جائے، ریلیف اور بحالی کے کاموں کو تیز کرنے کیلئے مزید افسران تعینات کئے جائیں۔
