عوام کی سہل اور سستے انصاف تک رسائی کو یقینی بنانا حکومت کی اولین ترجیح ہے ،عمران خان
شیئر کریں
وزیرِ اعظم عمران خان سے وفاقی وزیرِ قانون ڈاکٹر فروغ نسیم نے ملاقات کی۔ ملاقات میں پارلیمانی سیکرٹری ملیکا بخاری بھی موجودتھیں۔وزیرِ قانون نے وزیرِ اعظم کو مفادِ عامہ میں بنائے جانے والے نئے قوانین اور ان کے نفاذ میں اب تک کی پیش رفت سے آگاہ کیا۔نئے قوانین میں کوڈ آف سول پروسیجر(ترمیمی)بل2019، لیگل ایڈ اینڈ جسٹس اتھارٹی بل2019، انفورسمنٹ آف وویمن پراپرٹی رائٹس بل 2019، لیٹرز آف اینڈمنسٹریشن اینڈ سکسیشن سرٹیفیکیٹ بل 2019، وسل بلوئر پروٹیکشن اینڈ وجیلینس کمیشن بل2019، سروس ٹرابیونل (ترمیمی)بل2019، میوچل لیگل اسسٹنس بل2019، مسلم فیملی لاز (ترمیمی) ایکٹ2019سیکشن 4اور سیکشن 7اور قانونی نظام کے لئے ایکشن پلان فار وویمن اینڈ گرلز شامل ہیں۔ وزیرِ قانون نے بتایا کہ عوام کو ان کے حقوق و دیگر معاملات کے بارے میں متعلقہ قوانین و ذیلی قوانین سے متعلق آگاہی فراہم کرنے کے لئے پاکستان کوڈ کو آن لائن کر دیا گیا ہے ۔ اس ضمن میں پاکستان کوڈ کے نام سے ایک ایپلیکشن بھی بنا لی گئی ہے جو جلد عوام کو ان کے موبائل فونز پر دستیاب ہوگی۔ اس ایپلیکیشن کے تحت 1840سے مارچ 2019تک کے قوانین کی تمام تفصیلات حاصل کی جا سکیں گی۔ پاکستان کوڈ میں اب تک تیئس (23)مختلف شعبوں سے متعلق 844قوانین درج ہیں۔ وزیرِ قانون نے وزیرِ اعظم کو دیگر مختلف قوانین پر پیش رفت سے بھی آگاہ کیا۔ وزیر اعظم نے مفاد عامہ میں قانون سازی کے ضمن میں وزیرِ قانون کی کاوشوں کو سراہا۔وزیراعظم نے کہا کہ عوام کی سہل اور سستے انصاف تک رسائی کو یقینی بنانا حکومت کی اولین ترجیح ہے ۔
