کرپشن کے الزامات، سندھ فنانس ڈیپارٹمنٹ کے تین افسران برطرف
شیئر کریں
برطرف ملازمین میں عبداللہ بجاری، محمد علی شاہ اورخالق راھپوٹو شامل
انتہائی سیاسی اثر رکھنے والے افسران کے خلاف باقاعدہ تحقیقات شروع
(رپورٹ:شبیر احمد) سندھ فنانس ڈپارٹمنٹ کے تین افسران، جو ڈسٹرکٹ فنانس آفس حیدرآباد میں تعینات تھے ، کو کرپشن اور اختیارات کے ناجائز استعمال کے الزامات پر ان کے عہدوں سے ہٹا دیا گیا ہے ۔انتہائی سیاسی اثر رکھنے والے افسران جو سیاسی تعلقات کے باعث ماضی میں اہم اور منافع بخش عہدوں پر فائز رہے ہیںبرطرف کیے گئے افسران کو سندھ فنانس ڈپارٹمنٹ میں رپورٹ کرنے کی ہدایت کی گئی ہے ۔ ان میں گریڈ 17 کے اکاؤنٹنٹ عبداللہ بجاری شامل ہیں، جو سندھ کے وزیر اعلیٰ ہاؤس کے ایک سینئر افسر کے خاندان سے تعلق رکھتے ہیں، گریڈ 18 کے ٹریژری آفیسر خالق راھپوٹو، جو سیہون کے ایک سینئر سیاستدان کے قریبی رشتہ دار بتائے جاتے ہیں، اور گریڈ 14 کے سب اکاؤنٹنٹ محمد علی شاہ، جو سندھ کی ایک انتہائی سینئر سیاسی شخصیت کے خاندان سے تعلق رکھتے ہیں۔سندھ کے وزیر اعلیٰ سید مراد علی شاہ نے ان افسران کی برطرفی کے احکامات دیے ، جب کہ سیکریٹری فنانس فیاض احمد جتوئی نے انہیں سندھ فنانس ڈپارٹمنٹ میں رپورٹ کرنے کی ہدایات جاری کیں۔افسران کے خلاف باقاعدہ تحقیقات بھی شروع کر دی گئی ہیں۔
