وزیر صحت سندھ نے کراچی میں کرونا سے پہلی ہلاکت کی تصدیق کر دی
شیئر کریں
وزیر صحت سندھ ڈاکٹر عذرا فضل پیچوہو نے سندھ میں کوروناوائرس سے پہلی ہلاکت کی تصدیق کر دی۔77سالہ جاں بحق شخص کو گزشتہ روز تشویشناک حالت میں کراچی کے نجی ہسپتال میں منتقل کیا گیا تھا۔ اپنے ویڈیو پیغام میں ڈاکٹر عذرا فضل پیچوہو کا کہنا تھا جاں بحق شخص کوکینسر ، شوگر اور بلڈ پریشر کا مرض بھی تھا اور اس کی حالت ناساز تھی اور وہ کمزور تھا تاہم جب اس پر کوروناوائرس کا حملہ ہوا تو اس وجہ سے اس کا انتقال ہو گیا ۔ جاں بحق شخص کی کوئی ٹریول ہسٹری نہیں تھی۔ کورونا وائرس سے انتقال کرنے والے شخص کا تعلق کراچی سے ہے ۔ ڈاکٹر عذرا فضل پیچوہوکا کہنا تھا کہ ہم لوگوں سے کہتے ہیں کہ اپنے بزرگوں کے قریب نہ جائیں کیونکہ اگر آپ کو کوروناوائرس ہے اور آپ کو اس کا پتہ نہیں ہے تو یہ وائرس بزرگوں کو نہ لگے ۔ ان کا کہنا تھا کہ سندھ میں سب سے زیادہ کورونا کے مریضوں کی تشخیص ہوئی ہے اور یہ اس وجہ سے ہوا ہے کہ سندھ حکومت لوگوں تک پہنچ رہی ہے اور ہم کوشش کر رہے ہیں کہ جہاں تک ہمیں اطلاع ملتی ہے متاثرہ افراد تک پہنچ کر ان کو ٹیسٹ کریں۔
