تعلیمی بورڈز میں ہیرا پھیری، اسپیشل آڈٹ کا حکم
شیئر کریں
سندھ کے تمام بورڈ میں مالی بے ضابطگیوں اور مارکس کے طریقہ کار کا آڈٹ ہوگا
پبلک اکاونٹس کمیٹی کے اجلاس میں بورڈز کے دوسالہ آڈٹ پیراز کا جائزہ لیا گیا
سندھ اسمبلی کی پبلک اکاؤنٹس کمیٹی نے سندھ بھر کے تعلیمی بورڈز کی کارکردگی پر عدم اعتماد کا اظہار کرتے ہوئے سندھ بھر کے تمام ساتوں تعلیمی بورڈز میں مالی بے ضابطگیوں مارکس کے طریقے کار سمیت مالی اخراجات کی اسپیشل آڈٹ کرانے کا حکم دے دیا۔سندھ اسمبلی کی پبلک اکاؤنٹس کمیٹی کا اجلاس چیئرمین نثار کھوڑو کی صدارت میں ہوا۔اجلاس میں سندھ بھر کے تعلیمی بورڈز کی سال دو ہزار سولہ سے سال دو ہزار سترہ تک آڈٹ پیراز کا جائزہ لیا گیا۔چیئرمین پی اے سی نثار کھوڑو نے کہا کہ تعلیمی بورڈز کا معیار یہ بن چکا ہے کے الزام لگ رہے ہیں کے بورڈز میں پیسے دو اور مارکس لو؟اگر تعلیمی بورڈز میں پیسے دے کر اے پلس مارکس دی جائینگی تو بچے پھر انٹری ٹیسٹ میں فیل ہی ہونگے سندھ حکومت بورڈز کو امتحانی فیس کی مد میں سالانہ دو ارب روپے فراہم کر رہی ہے مگر تعلیمی بورڈز کی نتائج میں ہیرا پھیری کی وجہ سے تعلیم کا معیار سوالیہ نشان بن چکا ہے یہ نوجوان نسل کے مستقبل کا مسئلہ ہے اس لئے ہم تعلیم پر کسی صورت مصلحت نہیں کرینگے ۔کمیٹی رکن خرم سومرو نے استفسار کیا کہ فرسٹ ایئر کے نتائج میں ہیراپھیری پر انٹر بورڈ کے چیئرمین امیر قادری کو ہٹایا گیا تھا اس معاملے کی تحقیقات کہاں پہنچی چیئرمین کراچی انٹر و میٹرک بورڈ نے کہا کہ اگر امیدواروں کو مارکس کم دیتے ہیں تو بھی اشو اٹھ جاتا ہے اور اگر مارکس زیادہ دیتے ہیں تو بھی الزام لگ جاتا ہے ۔
