عدالت عالیہ کا زبردست حکم، کراچی شہر سے تمام سیاسی بینرز ہٹانے کا حکم
شیئر کریں
سندھ ہائی کورٹ نے شہر قائد سے تمام سیاسی بینرز ہٹانے کا حکم جاری کر دیا ہے ۔جمعرات کوسندھ ہائیکورٹ میں جسٹس ندیم اختر کی سربراہی میں دو رکنی بینچ نے سائن بورڈ سے متعلق کیس کی سماعت کرتے ہوئے کراچی بھر سے تمام سائن بورڈ، پینا فلیکس، ہورڈنگز اور سیاسی بینرز کو 31 جنوری تک ہٹانے کا حکم دے دیا ہے ۔جسٹس ندیم اختر نے یہ بھی حکم دیا ہے کہ اگر بل بورڈز، ہورڈنگز کسی امیدوار کی جانب سے ہو تو اس کے خلاف مقدمہ درج کیا جائے اور متعلقہ کنٹونمنٹ بورڈ یا ٹائون ان کے خلاف کارروائی کریں۔ عدالت نے مزید کہا کہ اگر متعلقہ افسران لیت ولعل سے کام لیں تو ان کے خلاف کارروائی کی جائے جب کہ پولیس حکام ملے ہوں تو ان کے خلاف بھی مقدمات درج کیے جائیں۔عدالت نے اپنے فیصلے میں کہا کہ الیکشن کمیشن اور شہری انتظامیہ تصاویر آویزاں کرنے والوں کے خلاف کارروائی کریں۔اس موقع پر عدالت کا کے ایم سی اور کنٹونمنٹس بورڈز کے وکلا سے مکالمہ ہوا۔ جسٹس ندیم اختر نے کہا کہ شہر میں آنے والوں کو کیا بتانا چاہتے ہیں کہ یہ مہذب لوگوں کا شہر ہے یا جنگل؟ اپنی ذمے داری پوری کریں اور اس شہر کو جنگل مت بنائیں۔اس موقع پر کنٹونمنٹ بورڈ کے وکلا نے کہا کہ کارروائیاں کر رہے ہیں تاہم کچھ مشکلات سامنے آ رہی ہیں جس پر عدالت نے برہمی کا اظہار کیا اور کہا کہ جو رکاوٹیں آ رہی ہیں ہمیں اس بارے میں بتائیں یا پھر 31 جنوری تک کارروائی کرتے ہوئے تفصیلی رپورٹ پیش کریں کہ کتنے سائن بورڈ ہٹائے اور کتنے ذمے داروں کے خلاف ایف آئی آر درج کی گئیں۔روزنامہ جرأت سے بات کرتے ہوئے شہری فلاح کو دھیان میں رکھنے والے ماہرین نے عدالت عالیہ کے اس فیصلے کی تعریف کی ہے۔
