نیوزی لینڈنے 92 رنز کا ہدف 10.1 اوورز میں ایک وکٹ کے نقصان پر حاصل کیا
شیئر کریں
پہلے ٹی ٹوئنٹی میں پاکستان کے دونوں اوپنرز حسن نواز اور محمد حارث کوئی رن نہ بنا سکے
پاکستان کرکٹ ٹیم کے نام ایک اور بدترین شکست درج ہوگئی نیوزی لینڈ کی ٹیم نے گرین شرٹس کو پہلے ٹی 20 میچ میں 9 وکٹوں سے ہرا دیا۔پاکستان اور نیوزی لینڈ کے درمیان پانچ ٹی 20 میچوں کی سیریز کا آغاز گرین شرٹس کی ناکامی سے ہوا۔ کرائسٹ چرچ میں کھیلے گئے پہلے ٹی ٹوئنٹی میچ میں 9 وکٹوں سے شکست دے کر سیریز میں ایک صفر کی برتری حاصل کر لی ہے۔نیوزی لینڈ نے پاکستان کی جانب سے دیا گیا 92 رنز کا آسان ہدف 10.1 اوورز میں صرف ایک وکٹ کے نقصان پر حاصل کر لیا۔کیویز کی گرنے والی واحد وکٹ اوپنر ٹم سیفرٹ کی تھی جنہیں ابرار احمد نے 44 کے انفرادی اسکور پر شکار کیا۔ فن ایلن اور ٹم رابنسن نے بالترتیب 29 اور 18 رنز اسکور کیے۔اس سے قبل میزبان ٹیم کے کپتان مچل بریسویل نے ٹاس جیت کر پہلے بولرز کو آزمانے کا فیصلہ کیا جو ان کے بولرز نے درست ثابت کر دکھایا۔کیوی بولرز نے پاکستان کے کسی بھی بلے باز کو جمنے کا موقع نہ دیا اور 18.4 اوورز میں گرین شرٹس کی بساط 91 رنز پر لپیٹ دی، جو پاکستان کا نیوزی لینڈ کی سر زمین پر کم تر اسکور بن گیا۔پاکستان کے دونوں اوپنرز حسن نواز اور محمد حارث بغیر کوئی رن بنائے پویلین لوٹے۔ اس ابتدائی نقصان کے بعد ٹیم سنبھل نہ سکی۔ خوشدل شاہ 32 رنز بنا کر ٹاپ اسکورر رہے۔ کپتان سلمان علی آغا 18 اور جہاں داد خان 17 رنز کے ساتھ ڈبل فیگر میں پہنچنے والے دیگر بلے باز رہے۔طویل عرصہ بعد بطور نائب کپتان ٹیم میں واپسی کرنے والے آل راونڈر شاداب خان بھی کم بیک یادگار نہ بنا سکے اور صرف 3 رنز پر وکٹ کھو بیٹھے۔عبدالصمد (7)، ابرار احمد (2)، عرفان خان، شاہین شاہ آفریدی اور محمد علی نے ایک، ایک رن اسکور کیا۔
