میڈیکل اسٹور پر پینا ڈول کا پیکٹ 1200 روپے میں فروخت ہونے لگا
شیئر کریں
مارکیٹ میں بخار سے متعلق میڈیسن کی قلت پیدا ہوگئی اور پینا ڈول کا پیکٹ مارکیٹ میں ہزار روپے کا فروخت ہونے لگا۔ تفصیلات کے مطابق سندھ سمیت کراچی میں شدید بارشوں کے بعد پانی سے پیدا ہونے والی بیماریوں میں اضافہ ہوگیا، جس کے باعث بخار سمیت عام ادویات بازار سے غائب ہوگئیں۔ کراچی کی مارکیٹ میں بخار سے متعلق میڈیسن کی قلت پیدا ہوگئی ہے۔ دُکاندار کا کہنا ہے کہ پینا ڈول کا پیکٹ ہول سیل مارکیٹ میں ہزار روپے کا ملنے لگا جبکہ میڈیکل اسٹور پر پینا ڈول کا پیکٹ 1200 روپے میں فروخت ہورہا ہے۔ڈینگی، ملیریا اور وائرل بخار کے بڑھتے ہوئے کیسز کے باعث بروفین ٹیبلٹ اورسیرپ کی بھی مارکیٹ میں کمی ہوگئی ہے۔ دُکانداروں نے گفتگو کرتے ہوئے بتایا کہ ڈائریا سے متعلق میڈیسن بھی کم مل رہی ہے۔ یاد رہے کراچی سمیت سندھ میں ڈینگی وائرس کے کیسز میں تیزی سے اضافہ دیکھنے میں آرہا ہے، صوبائی دارالحکومت میں وائرل بیماری کے مزید 192 کیسز سامنے آئے ہیں۔ سندھ حکومت نے صوبے میں ڈینگی بخار سے نمٹنے کے لیے اقدامات کرنے کا دعوی کیا ہے جب کہ صوبے کا بیشتر حصہ سیلابی پانی کی زد میں ہے۔
