،رینجرز کی کارروائی، چینی کے ایک لاکھ 40 ہزار بیگ برآمد
شیئر کریں
پاکستان رینجرز (سندھ) نے چینی ذخیرہ اندوزوں کے خلاف کریک ڈاؤن تیز کرتے ہوئے کراچی کے علاقے بلدیہ ٹاؤن میں کارروائی کے دوران چینی کے ایک لاکھ 40 ہزار بیگ برآمد کرلیے۔ترجمان رینجرز سندھ کی جانب سے جاری بیان کے مطابق چھاپہ مار کاروائیوں کے دوران کراچی میں حب ریور روڈ پر واقع 2 مختلف گوداموں سے مجموعی طور پر چینی کے ایک لاکھ 40 ہزار بیگ برآمد کر لیے گئے جن کی مالیت تقریباً ایک ارب سے زائد ہے۔ترجمان کے مطابق ذخیرہ شدہ چینی مبینہ طور پر بلوچستان کے راستے افغانستان بھیجی جانی تھی۔ترجمان رینجرز نے مزید بتایا کہ برآمد شدہ چینی مزید قانونی کارروائی کے لیے سول انتظامیہ کے حوالے کردی گئی۔بیان میں عوام سے اپیل کی گئی ہے کہ ایسے عناصر کے بارے میں فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے اطلاع دیں، ایسی معلومات دینے والوں کا نام صیغہ راز میں رکھا جائے گا۔خیال رہے کہ 28 اگست کو چینی کی قیمت میں اضافے کے بعد نگران وفاقی کابینہ کی اقتصادی رابطہ کمیٹی (ای سی سی) نے چینی کی اسمگلنگ اور ذخیرہ اندوزی روکنے کے لیے وزارت قومی غذائی تحفظ کو متعلقہ ایجنسیوں اور حکام سے تعاون کرنے کی ہدایت کردی تھی۔ ای سی سی کی ہدایت کے باوجود عوام کو کوئی ریلیف نہیں مل سکا اور چینی کی قیمت میں مزید اضافہ ہوا۔
