جشن آزادی پر ملکہ کوہسار مری میں سیاحوں کا سیلاب امڈ آیا، ویڈیو وائرل
شیئر کریں
جشن آزادی کی تقریبات کے آغاز کیساتھ ہی مری کی فضائیں ”پاکستان زندہ باد” کے نعروں سے گونج اٹھیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جشن آزادی کے موقع پر ملکہ کوہسار مری میں سیاحوں کا سیلاب امڈ آیاجس کی ویڈیوسوشل میڈیاپر وائرل ہوگئی۔جشن آزادی کی تقریبات کے آغاز کے ساتھ ہی مری کی فضائیں ”پاکستان زندہ باد” کے نعروں سے گونج اٹھیں، جبکہ آسمان رنگ برنگی روشنیوں اور شاندار آتش بازی سے جگمگا اٹھا۔
مال روڈ پر آتش بازی کا مظاہرہ دیکھنے کیلئے سیاحوں کی بڑی تعداد پہنچ گئی، جس کے باعث مال روڈ پر تل دھرنے کی جگہ نہ رہی۔ فیملیز سمیت سیاحوں کی غیر معمولی تعداد نے جشن آزادی کی تقریبات میں شرکت کی۔
مری کی تمام اہم نجی و سرکاری عمارتوں کو بھی جشن آزادی کی مناسبت سے برقی قمقموں سے سجا دیا گیا ہے، جبکہ شہر کے مختلف مقامات پر خصوصی تقریبات کا انعقاد کیا گیا۔
مال روڈ پر دفعہ 144 کے نفاذ کے باوجود جشن آزادی کی خوشیوں اور شہری و سیاحوں کی سرگرمیوں کے باعث شہر کی رونقیں عروج پر رہیں۔سیاح فیملیز نے بڑی تعداد میں آتش بازی کے مظاہرے میں شرکت کی اور پاکستان زندہ باد کے نعروں کے ساتھ جشنِ آزادی کا بھرپور جوش و خروش سے استقبال کیا۔ڈپٹی کمشنر مری آغا ظہیر عباس شیرازی اور ڈی پی او ڈاکٹر رضا تنویر سپرا کی سربراہی میں مال روڈ سمیت مختلف مقامات پر قانون نافذ کرنے والے اداروں اور پولیس کی بھاری نفری تعینات رہی، جبکہ سیکیورٹی کے فول پروف انتظامات کیے گئے۔
