کشمیریوں کی زیر حراست شہادتیں
شیئر کریں
ریاض احمدچودھری
بھارت کے غیر قانونی زیر قبضہ جموںوکشمیر میں بھارتی پولیس نے ضلع پلوامہ میں ایک کشمیری کو دوران حراست شہید کر دیا۔کشمیر پولیس نے امتیاز احمد پالہ کو پلوامہ کے لتر تھانے میں وحشیانہ تشدد کا نشانہ بنایا جس کے نتیجے میں اسکی موت واقع ہو گئی۔ وحشیانہ تشدد کی وجہ سے حالت بگڑنے پر پولیس نے امتیاز کو قریبی ہسپتال منتقل کیا جہاں ڈاکٹروںنے اسے مردہ قرار دیدیا۔متوفی کے اہلخانہ کا کہنا ہے کہ بھارتی پولیس نے امتیاز کو منگل کے روز حراست میں لیا تھا اور تھانے میں انہیںبہیمانہ تشدد کا نشانہ بنایا جسکے نتیجے میں وہ جاں بحق ہو گئے۔ اہلخانہ نے واقعے کی غیر جانبدارانہ اور مکمل تحقیقات کا مطالبہ کیا۔
مقبوضہ کشمیر میں دوران حراست تشدد سے تین کشمیریوں کی شہادت کے بعد بھارتی فوج نے تین افسران کو عہدوں سے ہٹادیا۔ مقبوضہ کشمیر کے ضلع پونچھ میں دوران حراست بہیمانہ تشدد سے تین زیرحراست کشمیریوں کی شہادت کے بعد بھارتی فوج نے بریگیڈیئر سمیت تین افسران کو انکے عہدوں سے ہٹادیا ہے۔معزول بریگیڈیئر بھارتی فوج کی انسداد بغاوت فورس راشٹریہ رائفلز کا سیکٹر کمانڈر تھا جو 1990 میں جموں و کشمیر میں عسکریت پسندی سے لڑنے کے مقصد کیلئے بنائی گئی تھی۔بھارتی فوج نے محفوظ حسین، محمد شوکت اور شبیر احمد کو جمعرات کو ضلع پونچھ میں محاصرے کے دوران حراست میں لیا تھا اور جمعہ کو تینوں کی لاشیں انکے اہلخانہ کے حوالے کی گئیں۔ ان تینوں شہریوں کو سرنکوٹ میں بھارتی فوجیوں پر ہونے والے حملے کے بعد گرفتار کیا گیا تھا جس میں پانچ فوجی ہلاک اور دو زخمی ہوئے تھے۔تینوں کا تعلق ایک قبائلی برادری سے ہے جسے گجر کہا جاتا ہے جو روایتی طور پر کشمیر کے پہاڑی علاقوں میں چراگاہ کی زندگی گزارتے ہیں۔
پاکستان نے بھارت کے زیرانتظام کشمیر میں علیحدگی پسند رہنما برہان وانی ،سمیت دیگر کشمیروں کی ہلاکت کو ماورائے عدالت قتل قرار دیتے ہوئے اس کی سختی سے مذمت کی ہے۔ مودی سرکار نے بھی ہزاروں کشمیریوں کی گرفتاری اور شہادت کا خود اعتراف کیا ہے۔ مقبوضہ کشمیر میں پانچ اگست سے اب تک پانچ ہزار ایک سو اکسٹھ کشمیریوں کو گرفتار کیا گیا ہے۔ایک رپورٹ کے مطابق گزشتہ تیس برسوں میں جموں و کشمیر میں بھارتی فوج نے 894بچوں کو شہید کر دیا ہے جبکہ کل شہدا کی تعداد 95،469ہو گئی ہے۔جموں و کشمیر کے عوام پر مظالم انسانی حقوق کی ِخلاف ورزی ہے اور یہ مظالم جموں و کشمیر کی عوام کو اْن کے حق خوداردایت کے مطالبے سے نہیں روک سکتے۔ پاکستان کو جموں و کشمیر میں حریت رہنماؤں کی گرفتاری پر شدید تشویش ہے۔پاکستان نے بھارتی حکومت پر زور دیا کہ وہ اقوام متحدہ کی سلامتی کونسل کی قرارداروں کے مطابق انسانی حقوق کی پاسداری کرے اور اپنے وعدے پورے کرے۔بھارت ایک غاصب ملک ہے جس نے کشمیر پر ناجائز قبضہ کر رکھا ہے اور اقوام متحدہ کی قراردادوں پر عمل درآمد کرنے کے بجائے ہٹ دھرمی کا مظاہرہ کر رہا ہے اورمقبوضہ کشمیر میں نہتے کشمیریوں پر مظالم کے پہاڑ توڑ رہا ہے۔ جعلی محاصروں اور سرچ آپریشن کے نام پر مظلوم کشمیریوں کی ٹارگٹ کلنگ کی جا رہی ہے کشمیریوں کے بنیادی حقوق سلب کررہے ہیں
بھارت نے جمہوریت اور سیکولر ازم کا نقاب اوڑھ رکھا ہے اور دنیا کو دھوکہ دے رہا ہے بھارت میں کوئی بھی اقلیت محفوظ نہیں اور ان کی عبادت گاہیں بھی محفوظ نہیں مساجد،چرچ اور گرداورے بھی ان سے محفوظ نہیں بھارت ایک جنونی ہندئو ریاست بن چکا ہے اور ملک پر انتہاء پسند ہندئوں کی حکمرانی ہے۔ ریاستی اداروں کی سرپرستی میں اقلیتوں کا قتل عام ہو رہا ہے۔بابری مسجد کی شہادت گولڈن ٹمپل میں ہزاروں سکھوں کا قتل عام عبادت گاہوں کی بے حرمتی روز کا معمول ہے۔ بھارت آہستہ آہستہ تقسیم کی طرف بڑھ رہا ہے جلد ہی بھارت کے ٹکڑے ٹکڑے ہونے والے ہیں۔
بھارت کے مظالم کے خلاف دنیا کی خاموشی مجرمانہ غفلت ہے اور اس سے انتہاء پسندوں کو شہ مل رہی ہے ۔ بھارت کچھ بھی کرے بالآخر اسے کشمیریوں کو آزادی دینی ہی پڑے گی۔اقوام متحدہ اپنی منظور شدہ قراردادوں پر عمل درآمد کروانے کیلئے اپنا کردار ادا کرے۔ خطے میں مسئلہ کشمیر کی وجہ سے دو ایٹمی قوتیں آمنے سامنے ہیں کوئی بھی چنگاری بڑے سانحے کا سبب بن سکتی ہے جسکا دنیا کو ادراک نہیں۔ جموں و کشمیر کے تنازعے کا حل صرف اْسی صورت میں ممکن ہے اقوام متحدہ کی قرارداد کی روشنی میں منصفانہ اور غیر جانبدارانہ استصواب رائے کے ذریعے کشمیریوں کو ان کا حق خود ارادیت دیا جائے۔
پاکستان اور کشمیر ایک لڑی میں پروے ہوئے ہیں ۔ پاکستانیوں اور کشمیریوں کے دل ایک ساتھ دھڑکتے ہیں ۔پاکستان کشمیر اور کشمیر پاکستان کے بغیر نامکمل ہے۔ کشمیریوں کے ساتھ ہمارا رشتہ محبت، بھائی چارے اوراخوت کا ہے۔ہم کل بھی کشمیریوں کے ساتھ کھڑے تھے،آج بھی ساتھ کھڑے ہیں اور کل بھی ساتھ کھڑے رہیں گے۔بھارت کو ہر ظلم کا حساب دینا ہوگا۔بے گناہ شہید کشمیریوں کا خون رنگ لائے گا اور آزادی کشمیر کی صبح ضرور طلوع ہوگی۔بھارت ریاستی جبر وتشدوکے ذریعے زیادہ دیر تک کشمیریوں کو ان کے بنیادی حق سے محروم نہیں رکھ سکتا۔ کشمیری عوام اپنی جدوجہد میں تنہا نہیں ہیں بلکہ پوری پاکستانی قوم ان کے ساتھ ہے۔
۔۔۔۔۔۔۔۔۔۔۔۔
