پی ایس ایل، 6فرنچائزز کے برقرار کھلاڑیوں کا اعلان
شیئر کریں
پاکستان سپر لیگ (پی ایس ایل) کی 6 فرنچائزز نے برقرار رکھے جانے والے کھلاڑیوں کے ناموں کا اعلان کر دیا ہے ، جنہیں ایونٹ کے 10ویں ایڈیشن میں برقرار رکھا ہے ۔کوئٹہ گلیڈی ایئٹرز کو پی ایس ایل کا چوتھا ایونٹ جتوانے والے سابق کپتان سرفراز احمد کو 9 برس بعد اْن کی ٹیم نے ریلیز کردیا ہے ۔اس بار فرنچائزز کے درمیان کھلاڑیوں کی ٹریڈز نہیں ہوئی ہے ، پی ایس ایل 2025 کا ڈرافٹ 11جنوری کو ہوگا جبکہ ایونٹ 8اپریل سے 19 مئی تک کھیلا جائے گا۔اس مرتبہ 19 ممالک کے 510کھلاڑیوں نے پی ایس ایل کے ڈرافٹ کیلئے سائن کیا ہے ۔پی ایس ایل کے قواعد کے مطابق ہر فرنچائز کو اپنے سابقہ اسکواڈ میں سے 8 کھلاڑیوں کو برقرار رکھنے کی اجازت ہوتی ہے ، 3 فرنچائزز نے مکمل طور پر ریٹینشن کا استعمال کیا ہے جبکہ کراچی کنگز ،ملتان سلطانز اور پشاور زلمی نے 7، 7 کھلاڑی برقرار رکھے ہیں۔ایچ بی ایل پی ایس ایل تین بار جیتنے والی دفاعی چیمپئن اسلام آباد یونائیٹڈ نے 8 کھلاڑی برقرار رکھے ہیں، ان میں کپتان اور گزشتہ ایونٹ کے پلیئر آف دی ٹورنامنٹ شاداب خان، نسیم شاہ (پلاٹینم) عماد وسیم (مینٹور) اور اعظم خان (ڈائمنڈ)، سلمان علی آغا (برانڈ ایمبسیڈر) اور حیدر علی (دونوں گولڈ) کولن منرو اور رومان رئیس (دونوں سلور ) شامل ہیں۔گزشتہ ٹورنامنٹ کی رنر اپ ملتان سلطانز نے 7 کھلاڑی برقرار رکھے ہیں، جن میں محمد رضوان اور اسامہ میر (دونوں پلاٹینم ) ڈیوڈ ولی(مینٹور) افتخار احمد (برانڈ ایمبیسیڈر) اور عثمان خان (تینوں ڈائمنڈ)، کرس جورڈن (گولڈ) اور فیصل اکرم (سلور) شامل ہیں۔پشاور زلمی نے 7 کھلاڑی برقرار رکھے ہیں، ان میں پی ایس ایل کی تاریخ میں سب سے زیادہ 3504 رنز بنانے والے بابراعظم اور صائم ایوب (پلاٹینم)، محمد حارث (ڈائمنڈ)، عارف یعقوب، مہران ممتاز اور سفیان مقیم (برانڈ ایمبیسڈر) (تینوں سلور ) اور علی رضا (ایمرجنگ) شامل ہیں۔ کوئٹہ گلیڈی ایٹرز نے 8 کرکٹرز برقرار رکھے ہیں، ان میں ابرار احمد، محمد عامر (مینٹور) رائلے روسو (تینوں ڈائمنڈ) اکیل حسین، سعود شکیل (برانڈ ایمبیسڈر) محمد وسیم جونیئر (تینوں گولڈ) خواجہ محمد نافع اور عثمان طارق (دونوں سلور) شامل ہیں۔کراچی کنگز نے 7 کھلاڑی برقرار رکھے ہیں، ان میں حسن علی اور جیمز ونس (ڈائمنڈ) عرفان خان اور شان مسعود (گولڈ)۔ عرفات منہاس (برانڈ ایمبیسیڈر) ٹم سائفرٹ اور زاہد محمود (تینوں سلور) شامل ہیں۔ لاہور قلندرز نے 8 کھلاڑیوں کو برقرار رکھا ہے ، ان میں شاہین شاہ آفریدی اور فخر زمان (دونوں پلاٹینم)، حارث رؤف (برانڈ ایمبیسڈر) اور سکندر رضا (دونوں ڈائمنڈ)، عبداللہ شفیق، جہانداد خان اور زمان خان (تمام گولڈ) اور ڈیوڈ ویزے (سلور) کے نام شامل ہیں۔
