امن معاہدہ کے باوجود صیہونی ظلم و ستم کا سلسلہ جاری،غزہ میں مزید 7فلسطینی شہید
شیئر کریں
المواسی کیمپ میںمتعدد زخمی ، اسرائیلی فوج کا رفح کراسنگ جزوی طور پر کھولنے کا اعلان
جنوبی رفح کے علاقے میں صیہونیوں نے بارود برسا دیا،متعدد خیموں میں آگ بھڑک اُٹھی
امن معاہدہ کے باوجود صیہونی ظلم و ستم کا سلسلہ جاری، گزشتہ 24 گھنٹے میں غزہ میں مزید 7فلسطینی شہید اور متعدد زخمی کر دیٔے گئے، جبکہ اس کے ساتھ ہی رفح کراسنگ جزوی طور پر کھولنے کا اعلان کر دیا گیا، جس کیلئے دیگر ممالک کی جانب سے دباو بڑھنے لگا تھا۔اسرائیلی فوج نے غزہ میں حملے کے دوران 2 بچوں سمیت مزید 7فلسطینی شہید کر دیٔے، جبکہ رفح کراسنگ کو جزوی طور پر کھولنے کا اعلان کیا گیا، تاہم یہ راہداری اس لئے نہیں کھولی جا رہی کہ یہاں کے لوگوں کو امداد دی جا سکے بلکہ یہ جنگ زدہ علاقے سے لوگوں کے انخلا کے لیے کھولاجا رہا ہے۔ذرائع کا کہنا ہے کہ صیہونیوں کی جانب سے یہ حملے غزہ میں امریکہ کی ثالثی میں ہونے والی جنگ بندی معاہدے کے بعد اسرائیل کی خلاف ورزیوں کی نشاندہی کا بین ثبوت ہیں، ان حملوں میں غزہ میں مزید 7فلسطینی شہید کئے گئے ہیں۔اسرائیلی فوج نے دعویٰ کیا ہے کہ حملے جنوبی رفح کے علاقے میں کیے گئے، جہاں حماس کے جنگجوؤں نے مصر کے ساتھ غزہ کی سرحد کے قریب اسرائیلی فوجیوں پر حملہ کیا تھا، جس میں چار فوجی زخمی ہو گئے تھے، اسی کو جواز بنا کر صیہونیوں نے بارود برسا دیا، جس میں فلسطینیوں کی شہادتیں ہوئیں۔طبی ذرائع کے مطابق اسرائیلی کارروائیوں میں شہید ہونے والوں میں شمالی غزہ کے زیتون محلے کے 2 فلسطینی بھی شامل ہیں، علاوہ ازیں جنوبی غزہ کے المواسی پناہ گزین کیمپ پر بمباری میں پانچ افراد نے جام شہادت نوش کیا، جن میں 2 بچے بھی شامل تھے۔المواسی کیمپ میں اسرائیلی میزائل حملوں کے نتیجے میں بم دھماکوں سے آگ بھڑک اُٹھی، جس نے متعدد خیموں کو اپنی لپیٹ میں لے لیا۔ شہری دفاع کے ترجمان نے بتایا کہ ان حملوں میں دو بچوں سمیت پانچ افراد شہید ہو گئے، اور دیگر متعدد افراد زخمی ہوئے ہیں، جن میں سے کچھ کی حالت تشویشناک ہے۔کویتی ہسپتال ذرائع کے مطابق ہلاک ہونے والے بچوں کی عمریں 8 اور 10 سال تھیں، جبکہ اس بربریت میں 32 فلسطینی زخمی ہوئے ہیں ، جن میں سے کچھ شدید طور پر جھلس گئے ہیں۔حماس نے اسرائیلی حملوں کی شدید مذمت کرتے ہوئے اسے جنگی جرم اور اس حملے کو جنگ بندی معاہدے کی خلاف ورزی قرار دیا، فلسطینی گروپ نے مصر، قطر اور امریکا جیسے ثالثوں سے اسرائیل پر دباؤ ڈالنے کا مطالبہ کیا تاکہ اسرائیلی فوج کو روکا جا سکے۔غزہ کے حکام نے بتایا کہ 10 اکتوبر کو جنگ بندی کے نفاذ کے بعد سے اسرائیلی فورسز نے 591 مرتبہ جنگ بندی کی خلاف ورزی کی، جس کے نتیجے میں کم از کم 360 سے زائد فلسطینی شہید اور 922 سے زائد زخمی ہوئے ہیں۔
