پاکستانی جعلی دستاویزات بنانے والے 10ایرانی باشندے گرفتار
شیئر کریں
وفاقی تحقیقاتی ادارے ایف آئی اے نے شہر قائد سے دس ایرانی باشندوں کو گرفتار کرلیا، ملزمان پاکستانی سفری دستاویزات کی بنیاد پر قطر جانے والے تھے۔ایف آئی اے انسانی اسمگلنگ ونگ نے کراچی کے مختلف علاقوں کارروائی کرتے ہوئے متعدد ایرانی باشندوں کو گرفتار کیا ہے جنہوں نے جعلی پاکستانی دستاویزات بنارکھی تھیں۔ایف آئی اے کے مطابق خفیہ اطلاع پر کارروائی کرتے ہوئے 10 ایرانی باشندوں کو گرفتار کرکے تین مقدمات کا اندراج کرلیا گیا ہے۔اس حوالے سے ایف آئی اے حکام نے بتایاکہ ملزمان پاکستانی اور ایرانی ایجنٹوں کی ملی بھگت سے پاکستانی سفری دستاویزات بنانے میں کامیاب ہوگئے، جس کی بنیاد پر وہ قطر جانے والے تھے تاہم ایف آئی اے کے انسداد انسانی اسمگلنگ سرکل نے منصوبہ بروقت ناکام بنا دیا۔گرفتار ایرانی شہریوں کو پاکستانی شناختی کارڈ کا اجرا حال ہی میں ہوا ہے، جس سے متعلق نادرا کے اعلی افسران اور ملازمین کے خلاف انکوائریاں جاری ہیں۔۔ایف آئی اے حکام نے کہا کہ منطقی و قانونی طور پر مقدمات کا بھی اندراج ہورہا ہے، واقعے میں ملوث نادرا افسران و ملازمین اور ان کے آلہ کار کو بھی گرفتار کیا گیا ہے۔ترجمان ایف آئی اے کے مطابق ایف آئی اے حکام نے بار بار انتباہ اور زیر التوا انکوائریوں کے باوجود نادرا افسران اور ملازمین کی جانب سے غیر قانونی شناختی کارڈز کے اجرا کو باعث تشویش قرار دیا ہے۔حکام کے مطابق گرفتار ایرانی شہریوں کو پاکستانی شناختی کارڈ کا اجرا حال ہی میں ہوا ہے۔گرفتار ہونے والے دس ایرانی باشندوں کے خلاف فارنرز ایکٹ 1946 اور تعزیرات پاکستان کی مختلف دفعات کے تحت مقدمات کا اندراج کر کے تمام ملزمان کو گرفتار کر لیا گیا ہے۔دورانِ تفتیش ہونے والے انکشافات کی روشنی میں تفتیش کا دائرہ اختیار یونین کونسل کی سطح سے نادرا اور پاسپورٹ اتھارٹی تک بڑھایا جائے گا۔
