عید قرباں چاقو چھریاں تیز کرنیوالے بھی میدان میں آگئے
شیئر کریں
عید قرباں پر جہاں عوام قربانی کے جانوروں کے ناز نخرے اٹھانے میں مصروف ہیں، وہیں جانور ذبح کرنے کے لئے چھریوں اور گوشت بنانے کے مختلف اوزار بنانے والوں کا کاروبار بھی چمک اٹھا ہے۔لکڑی کے اسٹالوں پر گوشت کاٹنے والی مڈی کی قیمت 200روپے سے بڑھ کر500روپے تک جا پہنچی ہے۔مارکیٹوں میں چھریاں 100 روپے سے 1500 روپے تک دستیاب ہیں جب کے ان کی دھار لگانے کے نرخ50روپے سے200روپے تک ہیں۔تفصیلات کے مطابق عید قرباں کے موقع پر ملک کے تمام شہروں اور قصبوں میں لوہاروں کی دکانوں پر چھریاں اور قربانی کے دیگر اوزار خریدنے والوں کے ساتھ ساتھ تیز کروانے والوں کا بھی رش نظر آرہا ہے۔مختلف شہروں میں چھریاں چاقوں اور ٹوکوں کی مانگ میں اضافے سے لوہاروں کا کاروبار عروج پر پہنچ گیا کوئی نئے اوزار خرید رہا ہے تو کوئی پرانے اوزاروں کی دھار بنوا رہا ہے۔عید قرباں قریب آتے ہی چھریاں چاقو بنانے اور چھریاں تیز کرنے والوں کی چاندی ہوگئی، جہاں کام میں تیزی آئی وہی ان کی قیمتوں میں بھی اضافہ ہوگیا، لوہاروں کی دکانوں پر اوزاروں کی تیاری کا کام خوب چل رہا ہے ایک طرف چھریاں چاقو بغدے فروخت کیے جارہے ہیں جبکہ دوسری طرف مشین پر لگے پتھر سے چھروں کی دھار بنانے میں کاریگری دکھائی جا رہی ہے یہاں پر فروخت ہونے والی چھریوں کے نرخ بھی دھار کی طرح تیز ہیں۔چھریاں چاقو سمیت دیگر اوزار بنانے والوں کا کہنا ہے کہ سال میں ایک بار ہی چند دنوں کیلئے یہ کاروبار عروج پر ہوتا ہے ورنہ سارا سال تو بس روٹین کا کام ہی چلتا ہے۔
