کراچی میں پانی ٹینکرز سے آرہا ہے تو لائنوں سے بھی آسکتا ہے، سندھ ہائیکورٹ
شیئر کریں
بتایا جائے ٹینکرز سے پانی کی سپلائی کو شفاف بنانے کیلئے کیا طریقہ کار ہے؟ کرپشن اور چوری روکنے کیلئے اب تک کیا کیا ہے؟
ایک ہائیڈرنٹس سے کتنے ٹینکرز جاری ہوتے ہیں؟ کیا کوئی ریکارڈ ہے روز کتنے ٹینکرز کتنی جگہ پانی سپلائی کرتے ہیں؟عدالت کااستفسار
کراچی(اسٹاف رپورٹر)سندھ ہائیکورٹ نے ڈالمیا روڈ پر واقع مجاہد کالونی میں پینے کے پانی کی قلت سے متعلق درخواست پر واٹر بورڈ حکام کو ہائیڈرنٹس سے پانی کی سپلائی کا طریقہ کار پیش کرنے کا حکم دے دیا۔جسٹس سید حسن اظہر رضوی کی سربراہی میں دو رکنی بینچ کے روبرو ڈالمیا روڑ پر واقع مجاہد کالونی میں پینے کے پانی کی قلت سے متعلق درخواست کی سماعت ہوئی۔درخواست گزار کے وکیل نے موقف دیا کہ پانی کے ساتھ یہ بجلی بھی چوری کرتے ہیں، مجاہد کالونی کے مکین پانی کی بوند بوند کو ترس چکے۔عدالت نے استفسار کیا کہ بتایا جائے ٹینکرز سے پانی کی سپلائی کو شفاف بنانے کے لیے کیا طریقہ کار ہے؟ کرپشن اور چوری روکنے کے لیے اب تک کیا کیا ہے؟ بتائیں، آپ کے ایس او پیز کیا ہیں؟ ایک ہائیڈرنٹس سے کتنے ٹینکرز جاری ہوتے ہیں؟ کیا کوئی ریکارڈ ہے روز کتنے ٹینکرز کتنی جگہ پانی سپلائی کرتے ہیں؟جسٹس سید حسن اظہر رضوی نے ریمارکس دیتے ہوئے کہا کہ پانی ٹینکرز سے آرہا ہے تو لائنوں سے بھی تو آسکتا ہے۔ عدالت نے واٹر بورڈ حکام کو ہائیڈرنٹس سے پانی کی سپلائی کا طریقہ کار پیش کرنے کا حکم دے دیا۔
