پیپلز پارٹی کے رکن قادر خان مندوخیل پر قومی اسمبلی کے احاطہ میں داخلہ پر پابندی
شیئر کریں
اسپیکر اسد قیصر نے پیپلز پارٹی کے رکن قادر خان مندوخیل پر قومی اسمبلی کے احاطہ میں داخلہ پر پابندی لگادی۔ اسپیکر اسد قیصر نے گزشتہ روز پارلیمنٹ کے مشترکہ اجلاس کے دوران غیر پارلیمانی رویے پر قادر خان مندوخیل کے قومی اسمبلی کے احاطہ میں داخلہ پر پابندی عائد کردی، قادر خان مندوخیل پر پابندی جمعے کو ہونے والے قومی اسمبلی اجلاس کے لیے ہوگی۔اسپیکر نے یہ کارروائی قومی اسمبلی کے قواعد و ضوابط اور پارلیمنٹ کے مشترکہ اجلاس کے رولز کے تحت تفویض اختیارات کے تحت کی ہے۔پارلیمنٹ کے مشترکہ اجلاس کے دوران اپوزیشن کو بات کرنے کی اجازت نہ ملنے پرقادر مندوخیل کی اسپیکر قومی اسمبلی اسد قیصر سے تلخ کلامی ہوئی، اسپیکر قومی اسمبلی اسد قیصر نے کہا کہ اپنی حد میں رہیں، ورنہ معطل کر دوں گا، یہ کوئی طریقہ ہے؟۔ قادر مندوخیل کی جانب سے سخت بات کہے جانے پر اسپیکر قومی اسمبلی نے بلاول بھٹو زرداری سے کہا کہ انھیں اپنے اراکین کے رویے کا نوٹس لینا چاہیے کہ ‘کیا ایسے عزت کی جاتی ہے اسپیکر کی؟‘ جس پر بلاول بھٹو نے انھیں کہا کہ ’ہم ہمیشہ آپ کی اور آپ کے عہدے کی عزت کرتے ہیں۔ اور آپ کو بھی اپنے عہدے کی عزت کا خیال رکھنا چاہیے۔
