بل گیٹس کا بٹ کوائن خریدنے سے متعلق اہم مشورہ
شیئر کریں
دنیا کے امیر ترین شخص اور مائیکرو سافٹ کے بانی بل گیٹس نے مشورہ دیا ہے کہ اگر آپ ایلون مسک سے زیادہ دولت مند ہیں تو ہی بٹ کوائن خریدیں۔میڈیارپورٹس کے مطابق بل گیٹس کا کہنا تھا کہ جب تک آپ دنیا کے امیر ترین شخص نہ ہوں، تب تک بٹ کوائن ڈیجیٹل کرنسی خریدنے سے گریز کرنا چاہیے ۔انٹرویو میں دنیا کے تیسرے امیر ترین شخص بل گیٹس نے کہا بٹ کوائن میں سرمایہ کاری عام لوگوں کو نہیں کرنی چاہیے ، یہ ماحولیات کے لیے بھی نقصان دہ ہے ، اس کی کان کنی کے لیے بہت زیادہ توانائی کی ضرورت ہوتی ہے ۔واضح رہے کہ ٹیسلا اور اسپیس ایکسس جیسی کمپنیوں کے بانی ایلون مسک نے بٹ کوائن کرنسی میں ڈیڑھ ارب ڈالرز کی سرمایہ کاری کی ہے ، ایک سال کے دوران بٹ کوائن کی قدر میں 400 فی صد سے زیادہ اضافہ ہوا تھا، مگر اب اس میں دوبارہ کمی آئی ہے ، اس کے باوجود دنیا بھر میں اس ڈیجیٹل کرنسی کے حوالے سے لوگوں کی دل چسپی بڑھی ہے ۔بل گیٹس کا کہنا تھا ایلون مسک کے پاس بہت زیادہ دولت ہے ، وہ بہت زیادہ ہوشیار بھی ہیں، اس لیے فکر کی کوئی بات نہیں کہ ان کے بٹ کوائنز کی قیمت اوپر نیچے ہوتی رہے ، لیکن جن کے پاس اتنے پیسے نہیں انھیں بٹ کوائن نہیں خریدنا چاہیے ۔اس سے قبل ایک انٹرویو میں بل گیٹس نے کہا تھا کہ کرپٹو کرنسی جس طرح کام کرتی ہے ، اس سے مخصوص مجرمانہ سرگرمیوں کا موقع ملتا ہے اور بہتر ہے کہ اس سے نجات حاصل کی جائے ، اس کے بغیر بھی زندہ رہا جا سکتا ہے ۔
