فاروق ستار کی متحدہ پاکستان میں واپسی کی گونج
شیئر کریں
(رپورٹ:شعیب مختار) اشارے ملنے لگے فاصلے دور ہو گئے سیاسی تنہائی کا شکار ڈاکٹر فاروق ستار کو آخر کار پرانے ساتھیوں کی یاد آ ہی گئی، ضمنی الیکشن میں متحدہ قومی موومنٹ کے امیدوار کی بھر پور حمایت کر دی۔ متحدہ پاکستان کی جانب سے خوش آ ئین عمل قرار دیدیا گیا، بلدیاتی انتخابات سے قبل متحدہ پاکستان اور فاروق ستار کے مابین بڑے بریک تھرو کا امکان۔تفصیلات کے مطابق گزشتہ روز سربراہ تنظیم (ایم کیو ایم پاکستان) بحالی کمیٹی ڈاکٹر فاروق ستار کی جانب سے پی ایس 88 کراچی ملیر 2 کے ضمنی انتخابات میں متحدہ پاکستان کے نامزد امیدوار انجینئر ساجد احمد کی بھر پور حمایت کا اعلان کیا گیا ہے اور ملیر کے تمام ووٹرز سے16 فروری کومتحدہ پاکستان کے نامزد امیدوار کو کامیاب کرنے کی اپیل کی گئی ہے جسے متحدہ قومی موومنٹ پاکستان کے متعدد رہنماؤں کی جانب سے دونوں فریقین کے مابین مثبت تعلقات استوار کرنے کا پہلا شاخسانہ قرار دیا جا رہا ہے، جبکہ پارٹی میں فاروق ستار کی واپسی کی گونج بھی گزشتہ کئی دہائیوں سے سنائی دے رہے ہیں۔تاہم عنقریب بلدیاتی انتخابات سے قبل خالد مقبول صدیقی اور فاروق ستار کی ملاقات بھی تصور کی جا رہی ہے جس کے تحت آ ئندہ چند روز میں متحدہ قیادت اور فاروق ستار کی اہم بیٹھک متوقع ہے۔
