ملک بھر میں مون سون کی بارشوں نے 14 جانیں نگل لیں
شیئر کریں
48 گھنٹوں میں آندھی، فلیش فلڈز، چھتیں،دیواریں گرنے سے متعدد حادثات
خیبرپختونخوا میں زیادہ نقصان، 38 مکانات متاثر، کئی افراد زخمی،پی ڈی ایم اے
ملک کے مختلف حصوں میں مون سون کی بارشوں، تیز آندھی اور فلیش فلڈز نے تباہی مچا دی، جس کے نتیجے میں گزشتہ دو روز کے دوران پنجاب، خیبرپختونخوا اور بلوچستان میں کم از کم 14 افراد جاں بحق جبکہ متعدد زخمی ہو گئے۔
شدید بارشوں سے گھروں، بنیادی ڈھانچے اور املاک کو بھی نقصان پہنچا ہے۔ صوبائی ڈیزاسٹر مینجمنٹ اتھارٹی (پی ڈی ایم اے) خیبرپختونخوا کے مطابق گزشتہ 48 گھنٹوں کے دوران تیز بارش، آندھی اور فلیش فلڈز کے باعث مختلف حادثات میں 7 افراد جاں بحق اور 19 زخمی ہوئے۔
جاں بحق ہونے والوں میں دو مرد، ایک خاتون اور چار بچے شامل ہیں۔ پی ڈی ایم اے کے مطابق شدید بارشوں کے نتیجے میں مجموعی طور پر 38 مکانات متاثر ہوئے، جن میں 36 کو جزوی جبکہ دو مکانات مکمل طور پر منہدم ہو گئے۔
متاثرہ علاقوں میں امدادی سرگرمیاں جاری ہیں اور ضلعی انتظامیہ کو الرٹ رہنے کی ہدایات جاری کر دی گئی ہیں۔ادھر پنجاب میں گزشتہ 24 گھنٹوں کے دوران آندھی اور بارش کے باعث پیش آنے والے مختلف حادثات میں دو افراد جاں بحق جبکہ 9 افراد زخمی ہوئے۔
ترجمان ریسکیو 1122 کے مطابق ضلع اٹک میں دیوار گرنے سے دو افراد جان کی بازی ہار گئے جبکہ تین افراد زخمی ہوئے۔ خوشاب میں آسمانی بجلی گرنے سے ایک شخص زخمی ہوا جبکہ سرگودھا میں تیز آندھی کے دوران سائن بورڈ گرنے سے ایک اور شخص زخمی ہو گیا۔
دوسری جانب بلوچستان کے ضلع ژوب میں موسلا دھار بارش کے باعث ایک مکان کی چھت گرنے سے ایک ہی خاندان کے دو افراد جاں بحق جبکہ تین افراد زخمی ہو گئے۔ حکام کے مطابق یہ افسوسناک واقعہ ژوب شہر کے علاقے اکاخیل میں پیش آیا، جہاں شدید بارش کے باعث مکان کا ایک کمرہ منہدم ہو گیا۔
زخمیوں میں ایک خاتون اور دو بچے شامل ہیں، جنہیں فوری طور پر طبی امداد کے لیے ژوب کے ہسپتال منتقل کر دیا گیا۔
