ایران کا امریکی انتباہ ماننے سے انکار؛ جنگ بندی کی تجاویز مسترد
شیئر کریں
ثالثوں کے ذریعے واشنگٹن کو جنگ بندی کیلئے اپنے مطالبات پہنچا دیے ہیں، ایران
ایران کے واضح موقف کو کسی صورت پسپائی یا پیچھے ہٹنے کی علامت نہ سمجھا جائے،ترجمان
ایران اور امریکہ کے درمیان جاری براہِ راست جنگ کے دوران پیر، کو تہران نے اعلان کیا ہے کہ اس نے ثالثوں کے ذریعے واشنگٹن کو جنگ بندی کے لیے اپنے مطالبات پہنچا دیے ہیں۔ ترکیہ خبر ایجنسی کے مطابق ایرانی ایرانی دفترِ خارجہ کے ترجمان اسماعیل بقائی نے واضح کیا کہ یہ مطالبات ”قومی مفادات” پر مبنی ہیں اور بالواسطہ رابطوں کا سلسلہ جاری ہے۔اسماعیل بقائی نے بریفنگ کے دوران بتایا کہ ایران نے تیسرے فریق (ثالثوں) کے ذریعے اپنے ”منطقی مطالبات” واشنگٹن تک پہنچائے ہیں۔ انہوں نے کہا کہ پیغامات کا تبادلہ ایک معمول کا عمل ہے جو اس وقت بھی جاری ہے۔ترجمان نے زور دے کر کہا کہ ایران کے واضح موقف کو کسی صورت ”پسپائی یا پیچھے ہٹنے” کی علامت نہ سمجھا جائے۔ انہوں نے امریکی تجاویز کو ”غیر منطقی اور حد سے زیادہ” قرار دیتے ہوئے مسترد کر دیا۔ 28 فروری 2026 سے شروع ہونے والے امریکی و اسرائیلی حملوں میں اب تک 1,340 سے زائد ایرانی شہیدہو چکے ہیں، جن میں سابق سپریم لیڈر علی خامنہ ای اور حال ہی میں پاسدارانِ انقلاب کے انٹیلی جنس چیف ماجد خادمی بھی شامل ہیں۔اطلاعات کے مطابق پاکستان، ترکی اور مصر اس بحران کو ختم کرنے کے لیے ثالثی کر رہے ہیں۔ پاکستان نے ایک 45 روزہ جنگ بندی کا منصوبہ (اسلام آباد ایکارڈ) پیش کیا ہے جس پر تہران غور کر رہا ہے، تاہم ایران نے کسی بھی ”ڈیڈ لائن” کے دباؤ میں آکر فیصلہ کرنے سے انکار کیا ہے۔ الجزہر کے مطابق ایران نے امریکہ کی جانب سے پیش کی گئی حالیہ جنگ بندی کی تجویز کو باضابطہ طور پر مسترد کر دیا ہے۔ ایرانی حکام کا موقف ہے کہ وہ مستقبل میں دوبارہ جنگ نہ ہونے کی ٹھوس ضمانت چاہتے ہیں اور عارضی جنگ بندی کے بدلے آبنائے ہرمز کو کھولنے کے لیے تیار نہیں ہیں۔ امریکی صدر ڈونلڈ ٹرمپ نے ایران کو منگل کی رات 8 بجے (ایسٹرن ٹائم) تک کی ڈیڈ لائن دی ہے کہ وہ آبنائے ہرمز کو تمام بحری آمد و رفت کے لیے کھول دے، ورنہ ایران کے بجلی گھروں اور پلوں کو نشانہ بنایا جائے گا۔اتوار کے روز ایران کی جانب سے فائر کیے گئے میزائل نے اسرائیل کے شہر حیفا میں ایک رہائشی عمارت کو براہ راست نشانہ بنایا۔ تازہ ترین اطلاعات کے مطابق ملبے سے 2 افراد کی لاشیں نکال لی گئی ہیں جبکہ ریسکیو ٹیمیں مزید دو لاپتہ افراد کی تلاش کر رہی ہیں۔ اس حملے میں ایک 10 ماہ کا بچہ اور ایک 82 سالہ شخص بھی زخمی ہوئے ہیں۔ایران نے کویت اور بحرین میں تیل کی تنصیبات اور پانی صاف کرنے والے پلانٹس کو بھی نشانہ بنایا ہے۔
