پاک فضائیہ کی بھارت پر میزائلوں کی بارش
شیئر کریں
ریاض احمدچودھری
پاکستان نے ہفتے کی صبح بھارت کے خلاف جوابی کارروائی یا آپریشن کو’بْنیَان مَّرصْوص’ یعنی ‘آہنی دیوار’ یا ‘سیسہ پلائی’ دیوار کا نام دیا ہے۔یہ نام قرآن پاک کی سورة الصف کی آیت نمبر چار سے لیا گیا ہے، جس میں کہا گیا کہ ‘اللہ کو وہ لوگ پسند ہیں جو اس کی راہ میں اس طرح صف بند ہو کر لڑتے ہیں گویا کہ وہ ایک سیسہ پلائی ہوئی دیوار ہیں۔’پاکستان نے آپریشن بنیان موصوص کا آغاز فتح ون میزائل سے کیا۔ فتح پاکستان کا تیار کردہ زمین سے زمین تک مار کرنے والے گائیڈڈ میزائل سسٹم ہے جس میں شامل میزائل 120 سے 400 کلومیٹر تک ہدف کو نشانہ بنانے کی صلاحیت رکھتے ہیں۔
بھارت نے پاکستان پر چھ اور سات مئی کو حملوں کو آپریشن ‘سیندور’ کا نام دیا تھا جس کے بارے میں انڈین میڈیا کا کہنا ہے کہ ہے اس آپریشن کا نام ‘سیندور’ اس لیے رکھا گیا کیونکہ انڈین حکومت پہلگام حملے میں مارے گئے انڈین شہریوں کی بیواؤں کو ‘انصاف اور مکمل بدلے’ کا پیغام دینا چاہتی تھی۔ اس سے قبل پاکستان نے بھارت کے خلاف مختلف عسکری کارروائیوں کے دوران آپریشنوں کے لیے مختلف نام استعمال کیے ہیں۔ جن میں آپریشن گلمرگ، آپریشن جبرالٹر، آپریشن چنگیز خان اور آپریشن کوہ پیم شامل ہیں۔خیال رہے کہ پاک بھارت حالیہ کشیدگی کے بعد امریکی وزیر خارجہ مارکو روبیو نے پاکستانی وزیر خارجہ اور آرمی چیف جنرل عاصم منیر سے رابطہ کر کے فریقین کو تحمل کا مظاہرہ کرنے پر زور دیا۔چینی وزارت خارجہ کی جانب سے بھی کہا گیا کہ پاکستان اور بھارت کے درمیان پیدا ہونے والی موجودہ صورت حال پر گہری نگاہ رکھے ہوئے ہیں، پاکستان اور بھارت کشیدگی کو کم کرنے کے لیے کوششیں کریں اور خطے میں امن کے لیے اقدامات کریں۔
سی این این اور بی سی سی کے صحافیوں نے بھارت کو آئینہ دکھا دیا۔امریکی نشریاتی ادارے سی این این سے منسلک صحافی نک رابرٹسن نے بھارت کے پاکستان کے سامنے گھٹنے ٹیک کر سیز فائر پر رضامند ہونے کی داستان سناتے ہوئے بتایا کہ جارحیت کے آغاز سے ہی پوری دنیا سیزفائر کرانے کی مسلسل کوششیں کررہی تھیں مگر بھارت تیار نہیں ہو رہا تھا۔ بھارتی جارحیت کے جواب میں پاک فوج نے کل رات آپریشن شروع کیا جس کے دوران بھارت پر تابڑ توڑ حملے کیے گئے۔ پاکستان نے نہ صرف بھارتی دفاع نظام کو مفلوج کردیا بلکہ میزائلوں کی بارش برسادی جس سے بھارت مذاکرات کی میز پر آنے پر مجبور ہوا۔بھارت کی اپیل پر امریکی وزیرخارجہ نے سعودی اورترک حکام سے رابطہ کیا اورسفارتی طریقے سے معاملہ حل ہوا اور سیزفائرممکن ہوسکا۔بی بی سی جنوبی ایشیا کے ریجنل ایڈیٹر اینبرسن اتھرجان نے کہا کہ یہ ماننا پڑے گا کہ پاکستان کی فضائی طاقت بھارت سے کہیں زیادہ ہے۔برطانوی صحافی کے بقول بھارت کو اب اس حقیقت کو بھی مان لینا چاہیے کہ پاک فضائیہ اس سے نہیں بہتر اور طاقتور ہے۔ صحافی نے پاک فضائیہ کی تعریف کرتے ہوئے کہا کہ پاک ایئرفورس نے بھارت کی پاکستان کو ناقابل تلافی نقصان پہنچانے کے منصوبے کو ناکام بنایا گیا۔بھارت نے اربوں ڈالرزکا اسلحہ خریدا تھا اس کے باوجود ناکامی کا سامنا کرنا پڑا۔
سیاسی و مذہبی قیادت نے پاک فوج کو خراج تحسین ادا کرتے ہوئے کہا کہ ‘ الحمدللہ افواج پاکستان نے مربوط طریقے سے طاقتور جواب دیا ہے، پہلگام واقعے پرحقائق جاننے کیلئے غیر جانبدارانہ تحقیقات کو بھارت نے ٹھکرا دیا،بھارت نے پاکستان پر میزائل اور ڈرون حملے کیے، ان جارحانہ اقدامات کے باوجود پاکستان نے انتہائی تحمل سے کام لیا۔ بھارتی حملوں میں نہتے اور معصوم شہریوں کو نشانہ بنایا گیا تاہم بھارت کی ان پے در پے کارروائیوں کا ہماری بہادر افواج نے بھرپور جواب دیا،آج ہم نے بھارت کو منہ توڑ جواب دیا ہے اور بے گناہوں کے خون کا بدلہ لے لیا ہے، ہمیں اپنی افواج پر فخر ہے۔ہم بھارت کی مذموم کوششوں کو ناکام بنانے کے لیے پر عزم ہیں۔سیاسی قیادت کا کہنا تھا کہ مادر وطن کے دفاع کے لیے ہماری بہادر افواج کی مہارت قابل تحسین ہے۔امیر جماعت اسلامی حافظ نعیم الرحمٰن کا کہنا ہے کہ پاک فوج کا بھارتی جارحیت پر جواب لائقِ تحسین ہے۔ پہلگام میں جعلی آپریشن کی بنیاد پر پاکستان پر حملہ کیا گیا اور جو جواب پاک فوج نے دیا وہ لائق تحسین ہے۔ بھارت نے پاکستان کے کئی علاقوں پر حملہ کیا، 30 سے زائد شہید ہوگئے۔ قوم ائیر فورس اور پاک فوج کے شانہ بشانہ کھڑی ہے، قوم نے اختلافات بھلا کر حکومت کا ساتھ دینے کا فیصلہ کیا ہے۔ہم سب مل کر اور ایک ہوکر دشمن کا مقابلہ کریں گے۔حافظ نعیم الرحمٰن نے یہ بھی کہا کہ حکومت سب سے پہلے آل پارٹیز کانفرنس بلائے۔بھارتی فوج نے اعتراف کیا ہے کہ پاکستان نے 26 مقامات پر فضائی حملے کیے، بھارتی فوجی اڈوں پر ساز و سامان اور عملے کو نقصان پہنچا۔پاکستان نے بھارتی جارحیت کا منہ توڑ جواب دیتے ہوئے ادھم پور، آدم پور اور شیر کوٹ ائیر بیسر سمیت ائیر فیلڈ کو تباہ کیا اور ملٹری چیک پوسٹوں کو نشانہ بنایا۔پاکستان نے بھارتی ریاست مہاراشٹرا کی الیکٹرک کمپنی پر سائبر حملہ کر کے بجلی کا نظام مکمل طور پر جام کر دیا اور ملٹری سیٹیلائٹ کو بھی جام کر دیا۔ اس کے علاوہ بھارتی وزیر اعظم نریندر مودی کی ریاست گجرات میں پاکستانی ڈرونز کئی گھنٹوں تک پرواز کرتے رہے۔ پاکستان نے بھارت کی بھٹنڈا اور سرسہ ائیر فیلڈز بھی تباہ کر دیا جبکہ اڑی سپلائی ڈپو کو تباہ کر ڈالا۔پاک فضائیہ کے جے ایف 17 تھنڈر طیاروں نے اپنے ہائپر سونک میزائل سے ایس 400 کا ائیر ڈیفنس سسٹم مکمل طور پر تباہ کر دیا۔بھارتی میڈیا اور حکومت کی جانب سے پہلے تو پاکستان کی جانب سے حملوں کی تردید کی گئی اور اپنی عوام کی آنکھوں میں دھول جھونکنے کے لیے یہ باتیں پھیلائی گئیں کہ بھارت نے پاکستان کے کئی ایف 16 طیارے تباہ کر دیے ہیں اور کراچی، لاہور اور راولپنڈی سمیت مختلف شہروں پر حملے کیے ہیں۔اب بھارت کی وزارت دفاع اور وزارت خارجہ کی جانب سے جاری بیان میں اعتراف کیا گیا کہ پاکستان نے پنجاب میں فضائی اڈے کو نشانہ بنانے کے لیے تیز رفتار میزائل کا استعمال کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
