پارا چنار واقعے پرکراچی میں احتجاجی دھرنے جاری،سوشل میڈیا پر شدید تنقیدپر مبنی تبصرے
شیئر کریں
پارا چنار واقعہ پر کراچی میں جاری دھرنے دو مقامات سے ختم کر کے سڑک کو ٹریفک کیلئے کھول دیا گیا۔تفصیلات کے مطابق شہر قائد کے 11مختلف مقامات پر کرم واقعہ پر مذہبی جماعت کے دھرنے جاری ہیں، جس کے نتیجے میں کئی اہم شاہراہیں اور چوراہے بند ہیں۔عوام شدید بیزار ی کا اظہار کر رہے ہیں جبکہ کراچی کے دھرنوں پر سوشل میڈیا میں شدید تنقید پر مبنی تبصرے جاری ہیں۔ ٹریفک پولیس کی جانب سے شہریوں کو متبادل راستے اختیار کرنے کی ہدایت دی گئی ہے، تاہم دھرنوں کے سبب متبادل راستوں پر بھی ٹریفک کا دبائو بڑھ گیا ہے۔ٹریفک پولیس کے مطابق نمائش چورنگی پر مرکزی دھرنا جاری ہے، ابو الحسن اصفہانی روڈ، عباس ٹائون کے سامنے دونوں اطراف کی سڑکیں بند ہیں۔نارتھ ناظم آباد فائیو اسٹار چورنگی پر احتجاج کے باعث ٹریفک متاثر ہے، یونیورسٹی روڈ پر سمامہ شاپنگ سینٹر کے سامنے دھرنا دیا گیا ہے۔ٹریفک پولیس حکام کے مطابق شارع فیصل کالا چھپرا کے قریب دونوں اطراف کی سڑکیں بند ہیں، سرجانی ٹائون روڈ پر بھی مذہبی جماعت کی جانب سے دھرنا جاری ہے۔شاہراہ پاکستان پر انچولی کے سامنے ٹریفک بند ہے، گلستان جوہر کامران چورنگی پر چاروں طرف ٹریفک بلاک ہے۔ناظم آباد نمبر 1، اور پاور ہائوس چورنگی پر دھرنے کی وجہ سے آمد و رفت متاثر ہے۔واضح رہے کہ کراچی میں گذشتہ شب بھی دھرنوں کے باعث اہم شاہراہوں اور متبادل راستوں پر بدترین ٹریفک جام رہا۔شہری رات دیر تک ٹریفک میں پھنسے رہے، جبکہ گاڑیوں میں موجود افراد شدید مشکلات کا شکار ہوئے۔اتوارکو ہفتہ وار تعطیل ہونے کی وجہ سے سڑکوں پر ٹریفک معمول سے کم ، تاہم متبادل راستوں پر دبائو بدستور موجود رہا۔ٹریفک پولیس کے مطابق دھرنوں کے باعث بند ہونے والی سڑکوں سے ٹریفک کو متبادل راستوں پر منتقل کیا جا رہا ہے۔
