چیف جسٹس نے جوڈیشل کمیشن اجلاس کی آڈیو ریکارڈنگ پبلک کردی
شیئر کریں
چیف جسٹس آف پاکستان جسٹس عمر عطا بندیال نے بڑا اقدام اٹھاتے ہوئے جسٹس قاضی فائز عیسی اور جسٹس سردار طارق مسعود کے خطوط کے بعد جوڈیشل کمیشن کے اجلاس کی آڈیو ریکارڈنگ پبلک کر دی۔سپریم کورٹ کی جانب سے جاری اعلامیہ کے مطابق چیف جسٹس کی ہدایت پر جوڈیشل کمیشن کی آڈیو ریکارڈنگ سپریم کورٹ کی ویب سائٹ پر جاری کی گئی، جوڈیشل کمیشن کے رولز میں نرمی کرتے ہوئے اجلاس کی آڈیو ریکارڈنگ جاری کرنے کی ہدایت دی گئی تھی۔اس حوالے سے اعلامیہ میں مزید بتایا گیا کہ پرنٹ اور الیکٹرانک میڈیا پر معاملے کو متنازع بنا دیا گیا، جوڈیشل کمیشن کے اجلاس کو دو معزز جج صاحبان نے متنازع بنا دیا، چیف جسٹس کی جوڈیشل کمیشن کی آڈیو ریکارڈنگ سپریم کورٹ کے آفیشل ویب سائیٹ پر جاری کی گئی ہے۔اعلامیہ میں ریکارڈنگ کا وہ وقت بتایا گیا جس میں اٹارنی جنرل نے ججز کے نام موخر کرنے کا ذکر کیا، آڈیو ریکارڈنگ کا دورانیہ 2 گھنٹے 25 منٹ 29 سیکنڈز ہے۔اعلامیے میں کہا گیا ہے کہ اٹارنی جنرل نے اجلاس موخر کرنے کی رائے دی، غیرمتوقع حالات میں جوڈیشل کمیشن کے چیئرمین نے رولز ریلیکس کرنے کی اجازت دی اور اجازت دی گئی کہ 28 جولائی کے اجلاس کی آڈیو ریکارڈنگ ویب سائٹ پر جاری کی جائے۔ اعلامیے میں بتایا گیا ہے کہ آڈیو ریکارڈنگ کے مطابق اٹارنی جنرل نے رولز بنانے تک معاملہ موخر کرنے کیلئے کہا، اٹارنی جنرل نے کسی ہائیکورٹ جج کے متعلق میرٹ پر رائے نہیں دی اور نہ ہی ہائیکورٹ کے کسی جج کو جانچنے یا مسترد کرنے پر رائے دی، اس طرح جوڈیشل کمیشن کے 5 ارکان کے کہنے پر اجلاس موخر کیا گیا۔واضح رہے کہ گزشتہ روز چیف جسٹس آف پاکستان جسٹس عمر عطا بندیال کی زیرصدارت جوڈیشل کمیشن کے اجلاس میں چیف جسٹس کے نامزد ججز کے نام کثرت رائے سے مسترد کردیے گئے تھے۔تاہم سپریم کورٹ کے اعلامیے میں کہا گیا تھاکہ جوڈیشل کمیشن کا اجلاس موخر کیا گیا ہے ، اجلاس موخر کرنے کی حمایت اٹارنی جنرل نے بھی کی، اجلاس موخر کرنے سے متعلق 5 ارکان کے ووٹ آئے، ناموں پر بحث کے بعد چیف جسٹس نے نئے ججز سے متعلق مزید ڈیٹا فراہم کرنیکی ہدایت کی۔اس حوالے سے سپریم کورٹ کے سینیئر جج قاضی فائز عیسی اور جسٹس طارق مسعود نے خط لکھا ہے۔
