بختاور بھٹو کی شادی، لیاری نے میدان مارنے کی تیاریاں شروع کر دیں
شیئر کریں
(رپورٹ: شعیب مختار) خوشیوں کے سماں میں رنگ بھرنے کے لیے لیاری نے ایک بار پھر میدان مارنے کی تیاریاں شروع کر دیں لیاری کے تاریخی”ککری گراؤنڈ”میں بختاور بھٹو کی شادی کی تقریبات آ ج منعقد کی جائیں گیں لیاری کے مکین بھٹو خاندان سے عقیدت کا اظہار کرنے کے لیے خوشی کے موقع پر جشن منائیں گے۔ لیاری کی خواتین نے بھی ہاتھوں میں مہندی لگوانے کے لیے ریلیوں کی صورت میں گراؤنڈ پہنچنے کی تیاریوں سے متعلق منصوبہ بندی مکمل کر لی۔ تفصیلات کے مطابق پیپلز پارٹی ڈسٹرکٹ ساؤتھ کی جانب سے بختاور بھٹو کی شادی کی تقریبات کا جشن منانے سے متعلق تیاریاں حتمی مراحل میں پہنچا دی گئیں ہیں اس ضمن میں ککری گراؤنڈ کو برقی قمقموں،رنگ برنگی لائٹوں اور مختلف اقسام کے پھولوں سے سجایا گیا ہے جہاں آج لیاری کے کلچر کے مطابق محترمہ بے نظیر بھٹو کی صاحبزادی کی شادی سے متعلق جشن منایا جائے گا۔ اس سلسلے میں ڈسٹرکٹ ساؤتھ کے صدر خلیل ہوت کا روزنامہ جرات سے گفتگو کرتے ہوئے کہنا تھا کہ 33سال قبل 18دسمبر 1987کو بختاور بھٹو کی والدہ کی سابق صدر پاکستان آصف علی زرداری سے شادی کی تقریب ککری گراؤنڈ میں منعقد کی گئی تھی جس کو مد ِ نظر رکھتے ہوئے بختاور بھٹو کی شادی کا جشن بھی اسی گراؤنڈ میں منانے کا فیصلہ کیا گیا ہے جس کے تحت مذکورہ گراؤنڈ میں میوزیکل شو کا بھی اہتمام کیا جا رہا ہے اس کے ساتھ ساتھ آ ج کے جشن میں نامور شخصیات،معروف گلوکاروں اور اسٹیج آرٹسٹوں کو بھی مدعو کیا گیا ہے جو خوشی کے موقع پر اپنی شرکت کو یقینی بنائیں گے ان کا کہنا تھا کہ ڈسٹرکٹ ساؤتھ خواتین ونگ کی جانب سے بھی لیاری کی عورتوں کے لیے مہندی لگوانے کا خاص انتظام کیا گیا ہے جس سے جشن میں شرکت کرنے والی خواتین بھر پور لطف اندوز ہو سکیں گیں۔
