لسبیلہ ،مسافر کوچ کھائی میں جاگری ، خواتین اور بچوں سمیت 39 افراد جاں بحق
شیئر کریں
بلوچستان میں لسبیلہ کے علاقے بیلہ میں چینکی اسٹاپ کے قریب موڑ کاٹتے ہوئے پل ستون سے ٹکرا کر مسافر کوچ کھائی میں جا گری، جس کے نتیجے میں خواتین اور بچوں سمیت 39 افراد جاں بحق اور کئی زخمی ہوگئے۔ تفصیلا ت کے مطابق مسافر کوچ کوئٹہ سے کراچی آ رہی تھی، کھائی میں گرنے کے بعد کوچ میں آگ بھڑک اٹھی، امدادی کارروائیوں کے دوران کوچ سے اب تک 39 لاشیں نکال لی گئیں اور کئی زخمی ہو گئے ہیں، اموات میں مزید اضافے کا خدشہ ہے، لاشوں اور زخمیوں کو ہسپتال منتقل کر دیا گیا۔ حادثے کی اطلاع پر فائر بریگیڈ گاڑیوں اور ریسکیو عملے نے موقع پر پہنچ کر آگ بجھائی۔ اسسٹنٹ کمشنر بیلہ حمزہ انجم نے بتایا کوئٹہ سے کراچی آنے والی مسافر بس تیز رفتاری کے باعث بیلہ کے قریب موڑ کاٹتے ہوئے پل کے ستون سے ٹکرا کر کھائی میں جا گری جس کے باعث اس میں آگ بھڑک اٹھی۔ اسسٹنٹ کمشنر نے بتایا کوچ میں 48 افراد سوار تھے جن میں سے ایک بچہ اور خاتون سمیت 3 افراد کو زندہ نکال لیا گیا ہے جبکہ 39 لاشیں نکالی جا چکی ہیں، جاں بحق ہونے والوں میں خواتین اور بچے شامل ہیں۔ امدادی کارروائیاں جاری ہیں۔ انہوں نے کہا کہ زیادہ تر لاشیں جل جانے کے باعث ناقابل شناخت ہیں اور ان کا ڈی این اے کروایا جائے گا۔ انچارج ایدھی فاؤنڈیشن ڈاکٹر حکیم لاسی نے کہا کہ مسافر کوچ میں 45 سے زائد افراد سوار تھے کوچ کو حادثہ سوا 2 بجے کے قریب پیش آیا جبکہ حادثے کے مقام کے قریب ایک ہوٹل کے مالک نے اطلاع دی، تو ریسکیو آپریشن 3 بجے کے قریب شروع کیا گیا۔ وزیراعلیٰ بلوچستان میرعبدالقدوس بزنجو نے بیلہ کوچ حادثے پر دکھ اور افسوس کا اظہار کیا ہے۔ انہوں نے جاں بحق مسافروں کے خاندانوں سے تعزیت اور ہمدردی کا اظہار کرتے ہوئے کہا ہے کہ اللہ تعالی مرحومین کی مغفرت اورلواحقین کو صبرعطا فرمائے۔
