مقبوضہ کشمیر میں بھارتی فوج کی پابندیاں24ویں روز بھی برقرار
شیئر کریں
مقبوضہ کشمیر میں بھارتی فوج کی جبر و پابندیاں مسلسل 24ویں روز بھی برقرارر ہیں۔کرفیو اور لاک ڈائون کے باوجود آزادی کے متوالے کشمیری سڑکوں پر نکلے ، بھارتی تسلط کے خلاف احتجاج کرتے نہتے کشمیریوں پر بھارتی فوج نے گولیاں برسائیں، پیلٹ گنوں کی فائرنگ اور آنسو گیس شیلنگ کی جس سے متعدد کشمیری زخمی ہوگئے ۔میڈیا رپورٹس کے مطابق مقبوضہ وادی میں بھارتی فوج کی بندشوں کے باوجود وادی میں کشمیریوں کا احتجاج جاری ہے ۔ گزشتہ روزوادی کے شمالی، جنوبی اور وسطی علاقوں کے لوگ سڑکوں پر نکلے اور بھارتی تسلط کے خلاف احتجاج کیا، سری نگر کے علاقے صورہ میں بھارتی فوج نے فائرنگ اور آنسو گیس شیلنگ سے مظاہرین کو منتشر کیا۔بھارتی فوج کے لاک ڈاون سے وادی میں لوگوں کو کھانے پینے کی اشیا، دواوں اور بنیادی ضروریات کی شدید قلت کا سامنا ہے ۔ تعلیمی ادارے ، دکانیں، بازار بدستور بند اور مواصلاتی ذرائع معطل ہیں، ٹی وی چینلز اور اخبارات کی بندش پر بھی بدستور پابندی جاری ہے ۔مقبوضہ وادی کے لوگ جیلوں میں قید اپنے بچوں کی خیریت کے لیے پریشان ہیں، بھارتی فوج نے حریت رہنماوں سمیت 10 ہزار سے زائد کشمیریوں کو حراست میں لیا ہواہے ۔
