ماحولیاتی تباہ کاری کی ذمہ دار جنگیں ہیں !
شیئر کریں
جاوید محمود
افغانستان، سری لنکا، کولمبیا ،شام اور روانڈا سمیت بعض دیگر افریقی ملکوں میں خانہ جنگی نے ماحول کو تباہ کر دیا۔ خانہ جنگی کے شکار ممالک پر اکثر غیر ملکی حملے بھی شروع ہو جاتے ہیں جو مزید ماحولیاتی تباہی کا باعث بنتے ہیں۔ جدید ریاستوں میں افغانستان کا شمار ان بدقسمت ملکوں میں ہوتا ہے جہاں اندرونی اور بیرونی سازشوں کی وجہ سے کئی دہائیوں سے جنگ جاری ہے جس سے نہ صرف لاکھوں افغان ہلاک و زخمی ہوئے بلکہ اس سے ماحول کو بھی زبردست نقصان پہنچا۔ 1979میں سوویت یونین کی مداخلت کی وجہ سے اندرونی سیاسی کشمکش خانہ جنگی میں تبدیل ہو گئی۔ سوویت یونین پر الزام ہے کہ اس نے افغانستان میں لاکھوں بارودی سرنگیں بچھائیں ۔کچھ ماہرین ان سرنگوں کی تعداد 10 لاکھ سے بھی زیادہ بتاتے ہیں جس سے افغانستان کی زرعی زمین بری طرح متاثر ہوئی ۔افغانستان میں دہائیوں پر پھیلی خانہ جنگی اور سابق سوویت یونین کی طرف سے حملے کی دوران یہاں بارودی سرنگوں کا ایک جال بچھایا گیا۔ افغانستان میں زیر کاشت زمین پہلے ہی تھوڑی تھی جو کچھ اندازوں کے مطابق 15 فیصد ہے لیکن اس میں سے بھی صرف چھ فیصد پر کاشت کی جا رہی تھی۔ جنگ اور جنگی اثرات کی وجہ سے یہ خیال کیا جاتا ہے کہ افغانستان اپنی تیس فیصد سے زیادہ زمین اور چرا گاہیں کھو چکا ہے۔ زرعی پیداوار بھی 1979 کے مقابلے میں 50 فیصد کم ہوئی ہے۔ ملک میں جنگلات دو فیصد سے بھی کم ہیں ملک بھی ایک کروڑ کے قریب بارودی سرنگیں ہیں جن سے 20 سے 30 افراد روزانہ ہلاک یا زخمی ہوتے ہیں۔ افغانستان میں 10 چھوٹے بڑے دریا ہیں جو 1964 تک ایک لاکھ 18 ہزار 500ایکڑ زمین کی کو سیراب کرتے تھے۔ مزید ایک لاکھ 70 ہزار 400 ایکڑ کو سراب کرنے کے پروگرام جاری تھے جن میں سے 80 فیصد پر 1973 تک کام بھی مکمل ہو چکا تھا لیکن جنگ اور خانہ جنگی کی وجہ سے یہ پورا آبی نظام بری طرح متاثر ہوا، جس کی وجہ سے ملکی زراعت کی پیداوار میں بھی کمی ہوئی اور پانی بھی آلودہ ہوا۔ 1990 سے 2007تک افغانستان کا ایک تہائی جنگل مکمل طور پر تباہ ہو گیا جبکہ ہجرت کر کے افغانستان آنے والے 85 فیصد جانوروں نے بھی یہاں کا رخ کرنا چھوڑ دیا۔ افغانستان کی جنگ اور بیرونی مداخلت کی وجہ سے وہاں نہ صرف انسانوں کو ناقابل تلافی نقصان پہنچا بلکہ ماحول بھی بری طرح متاثر ہوا۔
بالکل اسی طرح سری لنکا میں بھی خانہ جنگی نے قدرتی ماحول کو ناقابل معافی نقصان پہنچایا۔ اس جنگ نے ملک کے شمالی اور مشرقی علاقوں کو خطرناک بارود کی آلودگی سے بھی بھر دیا۔اس جنگ میں ہزاروں انسان تو پہلے ہی ہلاک ہو چکے تھے لیکن 2014 تک اقوام متحدہ کی ایک رپورٹ کے مطابق تقریبا 22 ہزار انسان دھماکہ خیز مواد اور بارودی سرنگوں کی وجہ سے زخمی ہوئے ۔تصادم سے سری لنکا کی زراعت کو بھی شدید نقصان پہنچا اور ایک اندازے کے مطابق 50 ہزار سے زیادہ ناریل کے درخت شدید متاثر ہوئے جبکہ جنگی ضروریات کے تحت 25 لاکھ سے زیادہ کھجور کے درختوں کو گرایا گیا۔ جنگ نے ساڑھے تین لاکھ سے زیادہ گھروں کو بھی تباہی سے دوچار کیا یا پھر انہیں نقصان ہوا جس کی وجہ سے آبادی کو منتقل ہونا پڑا اور وہ ایسی کچی آبادیوں میں منتقل ہوئے جہاں پر قدرتی ذرائع کا انہیں بے دریغ استعمال کرنا پڑا۔ریولوشنری ارمٹ فورسز آف کولمبیا سے تعلق رکھنے والے باغیوں اور کولمبیا کی حکومت کے درمیان 2016 میں ایک امن معاہدہ ہوا جس نے لاطینی امریکہ کے اس ملک میں جاری عشروں پر محیط جنگ کا خاتمہ کیا۔ گوریلا جنگ کی حکمت عملی کے تحت لڑی جانے والی جنگ کا میدان زیادہ تر کولمبیا کی جنگلات رہے ۔یہ جنگلات فارکی پناہ گاہیں تھیں اور جب بھی کل کولمبیا کی فوج کو ان کے خلاف کارروائی کرنی ہوتی تو وہ ان جنگلات کا رخ کر لیتی اور پھر یہاں کئی دنوں اور ہفتوں تک جاری رہنے والی جھڑپوں میں دونوں جانب سے انسانی جانوں کے ساتھ ساتھ قدرتی ماحول کو بڑے پیمانے پر نقصان پہنچتا ۔اس خانہ جنگی میں دو لاکھ 20ہزار سے زائد افراد موت کا شکار ہوئے جبکہ 70 لاکھ لوگ بے گھر ہوئے یا انہیں نقل مکانی کرنی پڑی لیکن اس جنگ کے جو ماحولیات پر پڑنے والے منفی اثرات سے نمٹنے میں شاید کئی عشرے درکار ہوں گے۔
خانہ جنگیوں کی یہ داستان ایشیا سے لے کر لاطینی امریکہ اور افریقہ تک جا بجا بکھری پڑی ہیں۔ ان میں قیمتی انسانی جانیں تو گئیں ہی تھی لیکن ان لڑائیوں کی وجہ سے قدرتی ماحول کو پہنچنے والے نقصان یہاں پسنے والوں کا مستقبل بھی غیر یقینی سے دوچار کر رکھا ہے۔ افریقہ کے مختلف ملکوں میں خانہ جنگیوں کی وجہ سے جنگلی حیات کو بھی بڑے پیمانے پر نقصان پہنچا ہے۔ براعظم افریقہ میں ہونے والی خانہ جنگیوں نے جنگلی حیات کو بری طرح متاثر کیا۔ مثال کے طور پر 1946 سے لے کر 2010 تک 70 فیصد ایسا علاقہ جو جنگلی حیات کے لیے مختص تھا وہ جنگ کی وجہ سے اس بر اعظم میں متاثر ہوا جس کی وجہ سے ہاتھیوں زرافوں اور کئی دوسرے جانوروں کو بے دردی سے ہلاک کیا گیا۔ ان کے اعضاء بیچ کر اس غیر قانونی تجارت سے ملنے والی رقم جنگی مقاصد کے لیے استعمال کی گئی ۔مثال کے طور پر صرف روانڈا کی خانہ جنگی کے دوران تقریباً سات لاکھ سے زائدمہاجرین ایک قومی پارک میں خیمہ زن ہوئے ۔ان مہاجرین نے کھانا پکانے پناہ گاہیں قائم کرنے اور دوسری ضروریات کے لیے دو سال تک روزانہ ایک ہزار ٹن لکڑی کاٹی۔ جب روانڈا میں جنگ ختم ہوئی تو 105 مربع کلومیٹر کے جنگل کو بری طرح تباہ کر دیا گیا تھا جبکہ 35 مربع کلومیٹر کا جنگل درختوں سے بالکل خالی ہو گیا تھا۔
