وزیراعظم عمران خان پیر کوایک روزہ دورے پر کراچی جائینگے
شیئر کریں
وزیراعظم عمران خان کامیاب جوان پروگرام کے تحت سندھ میں قرض کی تقسیم کے آغاز کے سلسلے میں پیر کو ایک روزہ دورے پر کراچی پہنچیں گے ۔وزیراعظم کامیاب جوان پروگرام کے تحت نوجوانوں میں قرض کی تقسیم کا سندھ میں آغاز ہوگیا۔ وزیراعظم عمران خان پیر کو ایک روزہ دورے پر کراچی پہنچیں گے اور سندھ بھر سے منتخب نوجوانوں میں رقم کے چیک تقسیم کریں گے ۔نوجوانوں میں چیک تقسیم کرنے کی تقریب گورنر ہائوس کراچی میں منعقد ہوگی، تقریب کی تیاریاں شروع کردی گئیں، وزیراعظم تقریب سے خطاب کریں گے جبکہ وفاقی وزرا اور نوجوانوں کی بڑی تعداد تقریب میں شریک ہوگی۔وزیر اعظم کے معاون خصوصی برائے امور نوجوانان عثمان ڈارکا کہنا ہے کہ وزیراعظم نے نوجوانوں کے لئے ملکی تاریخ کا سب سے زیادہ بجٹ مختص کیا ہے ، سندھ کے لاکھوں نوجوان کامیاب جوان پروگرام کے بینر تلے آ چکے ہیں۔ کامیاب جوان پروگرام سے روزگار میں اضافہ اور غربت میں کمی آئے گی۔معاون خصوصی نے مزید کہا کہ حکومتی سرپرستی میں نوجوانوںکو بہترین رہنمائی اور تربیت دیں گے ، نوجوانوں کو جلد روزگار کی فراہمی حکومت کی اولین ترجیح ہے ۔
