قوم اسلام آباد میں دھرنے کیلئے تیار رہے، عمران خان کا بڑا اعلان
شیئر کریں
سابق وزیر اعظم عمران خان نے قوم کو آئندہ الیکشن کے اعلان تک اسلام آباد میں دھرنا دینے کیلئے تیار رہنے کی ہدایت کرتے ہوئے کہا ہے کہ وہ چند ہفتوں میں اسلام آباد آنے کی کال دیں گے ، جب تک الیکشن کا اعلان نہیں ہوتا سب نے اسلام آباد میں بیٹھنا ہے ۔ان خیالات کا اظہار چیئرمین پاکستان تحریک انصاف عمران خان نے پی ٹی آئی کے یوم تاسیس پر جاری خصوصی ویڈیو پیغام میں کیاجس میں انہوں نے پی ٹی آئی کارکنان کو 26 ویں سالگرہ کی مبارک باد پیش کی۔عمران خان کا ویڈیو پیغام سابق وزیر مواصلات مراد سعید نے ٹوئٹر پر شیئر کیا جس میں سابق وزیراعظم کا کہنا تھا کہ پارٹی بنانے کا مقصد اسلامی فلاحی ریاست کے مطابق نیا پاکستان بنانا ہے ، ہماری پارٹی کے 3 اہم اصول ہیں۔انہوں نے بتایا کہ پہلا اصول، خوددار پاکستان جو کسی کی غلامی نہ کرے اور ہرے پاسپورٹ کی عزت ہو، دوسرا فلاحی ریاست اور تیسرا قانون کی بالادستی کیونکہ قانون کی بالادستی کے بغیر کوئی ملک ترقی نہیں کرسکتا۔ویڈیو پیغام میں سابق وزیراعظم عمران خان نے کارکنوں اور قوم کو مخاطب کرکے کہا کہ وہ چند ہفتوں میں اسلام آباد آنے کی کال دیں گے اور جب تک الیکشن کا اعلان نہیں ہوتا سب نے اسلام آباد میں بیٹھنا ہے ۔عمران خان نے واضح کیا کہ کئی برس کی جدوجہد کے بعد 2018 میں حکومت ملی تو ہم نے کوشش کی قانون کی بالادستی ہو، طاقتور قانون کے نیچے آئے اور این آر او کسی کو نہ دیا جائے ساتھ ہی پی ٹی آئی حکومت نے کمزوروں کیلئے اقدامات اٹھائے اور ہیلتھ کارڈ متعارف کروایا جس کا غریب ممالک میں تصور بھی نہیں ہے ۔واضح رہے کہ سابق وزیراعظم عمران خان کی قیادت میں پی ٹی آئی کی مرکزی قیادت کا اجلاس منعقد ہوا جس میں عمران خان نے اسلام آباد مارچ کی تیاریوں کیلئے پشاور، لاہور اور ملتان کے دوروں کا اعلان کیا۔اجلاس کے دوران الیکشن کمیشن کے خلاف احتجاج کی تیاریوں کا جائزہ لیا اور فارن فنڈنگ کیس سے متعلق ہائیکورٹ کے فیصلے پر اطمینان کا اظہار کیا گیا۔
