گلستان جوہرسے بھارتی خفیہ ایجنسی ’’را‘‘ کا سرگرم ایجنٹ گرفتار
شیئر کریں
وفاقی تحقیقاتی ادارے ایف آئی اے نے کراچی میں بڑی کارروائی کرتے ہوئے بھارتی خفیہ ایجنسی "را” نیٹ ورک کے اہم رکن کوگرفتار کر لیاہے۔ترجمان ایف آئی اے کے مطابق ایف آئی اے انسداد دہشت گردی ونگ نے کراچی میں بڑی کارروائی کی جس کے دوران بھارتی خفیہ ایجنسی "را” نیٹ ورک کے اہم رکن عبدالجبار عرف ظفر ٹینشن کو گلستان جوھر سے گرفتار کرلیا گیا،گرفتار ملزم بم تیار کرنے اور جدید ہتھیار چلانے کا ماہر ہے،ملزم کراچی واٹر اینڈ سیوریج بورڈ میں ملازمت کرتا تھا ،جبکہ عسکری تربیت کے لیے چار مرتبہ بھارت جاچکا ہے ۔ترجمان نے بتایا کہ ملزم کا تعلق ایم کیو ایم لندن سے ہے، جبکہ ملزم ایم کیو ایم حقیقی کے رہنما آفاق احمد اور کارکنوں پر حملوں میں بھی ملوث ہے اور وہ کراچی میں "را” کے سلیپر سیل کیلئے کام کررہا تھا،ملزم کو تمام ہدایات بھارت سے محمود صدیقی دیتا تھا اورمحمود صدیقی کی طرف سے بھیجی گئی حوالہ ہنڈی کی رقم وصول کرتا رہا تھا،بھیجی گئی رقم دہشت گردی اور ٹارگٹ کلنگ کیلئے استعمال کی جاتی تھی،ملزم اجمل پہاڑی اور ارشد چھوٹا گروپس کے ساتھ کام کرتا رہا ہے، جبکہ دہشتگردی کی کارروائیوں میں ملوث ہونے پر دو دفعہ جیل بھی جا چکا ہے۔
