ڈی جی ایم ڈی اے فعال، قبضہ مافیا پریشان
شیئر کریں
(رپورٹ:نجم انوار)ڈائریکٹر جنرل سعید صالح جمانی نے ایم ڈی اے تیسر ٹاؤن کا دورہ کیا۔جہاں انہوں نے سابق افسران کے ہاتھوں کرائے گئے قبضوں اور تباہیوں پر اظہار افسوس کیا۔ حال ہی میں نئے تعینات ڈائریکٹر جنرل سعید صالح جمانی نے تیسر ٹاؤن کے دورے میںادارے کی بہتری اور ترقیاتی منصوبو ں کے حوالے سے اپنی گرمجوشی ظاہر کی۔ اطلاعات کے مطابق ڈی جی ایم ڈی اے سعید صالح جمانی کے دورے کے حوالے سے ایم ڈی اے پر مسلط قبضہ مافیا کے افسران عرفان بیگ اور لئیق احمد کافی پریشان دکھائی دیے۔ جرأت کو موثق ذرائع سے ملنے والی اطلاعات کے مطابق ڈی جی کے دورے کے دوران عرفان بیگ اور لئیق احمد مسلسل انکروچمنٹ کے تاحال اپنے معاون افراد سے مسلسل رابطے میں رہے اور اُنہیں تاکید کرتے رہے کہ ڈی جی کو اُن کی زیر قبضہ زمینیں نہ دکھائی جائیں۔ اس دوران انکروچمنٹ کے افراد عرفان بیگ اور لئیق احمد کو ڈی جی کی سرگرمیوں کی لمحہ لمحہ اطلاع دیتے رہے۔باخبر ذرائع کے مطابق نئے ڈی جی سعید صالح جمانی کو نئے منصوبوں پر بریفنگ دی گئی ہے مگر ایم ڈی اے کے اندر موجود کالی بھیڑیں یہ یقینی بنا رہی ہے کہ سعید صالح جمانی کو ماضی قریب کے سارے قبضوں سے دور رکھا جائے۔ واضح رہے کہ قبضہ مافیا کے سرغنہ عرفان بیگ اور لئیق احمد کی پرانی ٹیم تاحال تیسر ٹاؤن، شاہ لطیف، اور نیو ملیر ہاؤسنگ اسکیم میں پوری طرح سرگرم ہے۔
