غیرملکی درآمدات میں 23فیصد اضافہ،حجم 5.86ارب ڈالر رہا
شیئر کریں
اسمارٹ موبائل فونز کی امپورٹ میں 125فیصد سے اضافہ، 14کروڑ 53لاکھ ڈالر کے موبائل درآمد
غذائی اشیا ء کی درآمدات میں41فیصد اضافہ ، دودھ، کریم، گندم، خشک میوہ جات کی درآمد بھی بڑھ گئی
رواں مالی سال کے پہلے مہینے میں غیر ملکی درآمدات میں 23فیصد اضافہ ریکارڈ کیا گیاہے جس کے بعد مجموعی حجم 5ارب 86کروڑ ڈالر رہا، پیٹرولیم مصنوعات اور پام آئل سب سے زیادہ درآمد کی گئیں۔دستاویز کے مطابق پیٹرولیم کی درآمد 6.42 فیصد اضافے سے 1.34ارب ڈالر ریکارڈ کی گئیں، اسمارٹ موبائل فونز کی درآمد میں 125فیصد سے زیادہ اضافہ ہوا، جولائی 2025 میں 14کروڑ 53لاکھ ڈالر کے موبائل درآمد ہوئے ، صرف ایک ماہ میں 41 ارب 38کروڑ روپے کے موبائل منگوائے گئے ۔دستاویز کے مطابق ٹیکسٹائل سیکٹر کی درآمدات میں 21فیصد اضافہ دیکھنے میں آیا اور حجم 59کروڑ ڈالر سے تجاوز کر گیا، ٹرانسپورٹ سیکٹر میں درآمدات 167فیصد اضافے سے 30کروڑ 70لاکھ ڈالر رہیں، گاڑیوں کی درآمد میں 139فیصد اضافہ ہوا ، ماہانہ حجم 3کروڑ 28لاکھ ڈالر رہا، گاڑیوں کی مقامی اسمبلنگ کیلئے پرزوں کی امپورٹ 290فیصد تک بڑھ گئی۔بسوں، ٹرکوں، ہیوی گاڑیوں، جہازوں کی درآمدات میں بھی اضافہ ہوا، جولائی میں موٹر کارز کے پارٹس کی درآمد 13کروڑ 42لاکھ ڈالر ریکارڈ کی گئی ، غذائی اشیا ء کی درآمدات 41فیصد اضافے سے 74کروڑ 38لاکھ ڈالر رہی ، دودھ، کریم، گندم، خشک میوہ جات، چائے ، مصالحوں کی درآمد بھی بڑھ گئی ۔سویا بین، پام آئل، چینی، دالوں سمیت دیگر اشیا ء کی درآمد میں بھی اضافہ دیکھا گیا، گزشتہ ماہ سب سے زیادہ 30کروڑ 21لاکھ ڈالر مالیت کا پام آئل امپورٹ ہوا، مشینری کی درآمدات میں 29فیصد اضافہ ہوا جس کے بعد حجم 92کروڑ 75 لاکھ ڈالر رہا، زرعی آلات کی درآمد 9.13 فیصد اضافے سے 89کروڑ ڈالر رہی، سونے کی درآمد میں 100فیصد کمی ریکارڈ کی گئی۔
