مہنگائی کے طوفان نے ایک ماہ میں عوام کی چیخیں نکلوا دیں
شیئر کریں
عوام کو مہنگائی کا تگڑا جھٹکا، شرح میں 50 فیصد سے زائد اضافہ ہو جانے کا انکشاف
ٹماٹر،چکن، انرجی سیور، سرسوں کا تیل، سگریٹ، آلو،انڈوں کی قیمت میں اضافہ
عوام کو مہنگائی کا تگڑا جھٹکا، صرف 1 ماہ میں مہنگائی کی شرح میں 50 فیصد سے زائد اضافہ ہو جانے کا انکشاف۔ تفصیلات کے مطابق مہنگائی کی ہفتہ وار رپورٹ کے حوالے سے سامنے آنے والے اعداد و شمار کے مطابق ایک ماہ میں مہنگائی کے طوفان نے عوام کی چیخیں نکلوا دیں۔ بتایا گیا ہے کہ رمضان المبارک کے آغاز پر ملک میں مہنگائی کی شرح 4 عشاریہ 26 تھی جو ایک ماہ میں 50 فیصد اضافے سے 7 فیصد سے اوپر چلی گئی۔رمضان المبارک کے آخری ہفتے کے دوران ملک میں مہنگائی میں اضافہ کا رجحان ریکارڈ کیا گیا اور مہنگائی میں 0۔21 فیصد اضافہ ہوا ، سالانہ بنیاد پر بھی مہنگائی میں اضافے کی رفتار کی شرح بھی 6۔44 فیصد سے بڑھ کر7۔04 فیصد ہوگئی ہے۔ وفاقی ادارہ شماریات کی جانب سے جاری ہفتہ وار مہنگائی رپورٹ کے مطابق رمضان کے آخری ہفتے میں مجموعی طور پر 18 اشیائے ضروریہ مہنگی جبکہ 9 اشیائے ضروریہ کی قیمتوں میں کمی ریکارڈ کی گئی ہے اور 24 اشیائے ضروریہ کی قیمتوں میں استحکام رہا۔رپورٹ میں بتایا گیا کہ پیاز کی قیمتوں میں 2۔52 فیصد، دال چنے کی قیمتوں میں 0۔11 فیصد، دال مسور کی قیمت میں 1۔34 فیصد، چینی کی قیمت میں0۔76 فیصد، لہسن کی قیمت میں 4۔76 فیصد، ایل پی جی کی قیمت میں2۔67 فیصد اور آٹے کی قیمت میں 1۔05 فیصدکمی واقع ہوئی۔ اسی طرح ٹماٹر کی قیمت میں 24۔85 فیصد، چکن 7۔33 فیصد، بریڈ 1۔08 فیصد، انرجی سیور کی قیمت میں 0۔91 فیصد، سرسوں تیل کی قیمت میں 0۔41 فیصد، سگریٹ کی قیمت میں 0۔40 فیصد، آلو کی قیمت میں 0۔33 فیصد، انڈوں کی قیمت میں 0۔31 فیصد اور جلانے والی لکڑی کی قیمت میں 0۔36 فیصد اضافہ ہوا۔اعدادو شمار میں بتایا گیا کہ حالیہ ہفتے کے دوران حساس قیمتوں کے اعشاریے کے لحاظ سے سالانہ بنیاد پر 17 ہزار 732 روپے ماہانہ تک آمدنی رکھنے والے طبقے کے لیے مہنگائی میں اضافے کی رفتار0۔18 فیصد اضافے کے ساتھ 5۔77 فیصد، 17 ہزار 733روپے سے 22 ہزار 888روپے ماہانہ تک آمدنی رکھنے والے طبقے کے لیے مہنگائی میں اضافے کی رفتار 0۔21 فیصد اضافے کے ساتھ 7۔38 فیصد، 22 ہزار 889 روپے سے 29 ہزار 517 روپے ماہانہ تک آمدنی رکھنے والے طبقے کے لیے مہنگائی میں اضافے کی رفتار0۔20 فیصد اضافے کے ساتھ6۔52فیصد ریکارڈ کی گئی۔ادارہ شماریات کے مطابق 29 ہزار 518روپے سے 44ہزار 175 روپے ماہانہ تک آمدنی رکھنے والے طبقے کے لیے مہنگائی میں اضافے کی رفتار0۔22 فیصد اضافے کے ساتھ6۔15 فیصد رہی۔
