آصف زرداری کے تاریخی کردارسے بحران کا خاتمہ کیا‘شہبازشریف
شیئر کریں
وزیراعظم شہباز شریف نے کہا ہے کہ اللہ تعالی کے حضور سجدہ شکر بجا لاتے ہیں جس نے ہمیں ایک بار پھر سرخرو فرمایا،چوہدری شجاعت حسین نے ایک بار پھر اپنے عظیم والد اور خاندان کی جمہوری روایت کو زندہ و جاوید کیا،آصف زرداری کے تاریخی کردار اور سیاسی رواداری نے بحران کا خاتمہ کیا، اتحاد اور حمایت سے جمہوریت فتح مند ہوئی،یہ بات انھوں نے سماجی رابطہ کی ویب سائٹ ٹویٹر پر ایک بیان میں کہی۔ وزیراعظم شہباز شریف نے کہا ہے کہ اللہ تعالی کے حضور سجدہ شکر بجا لاتے ہیں جس نے ہمیں ایک بار پھر سرخرو فرمایا۔ چوہدری شجاعت حسین چوہدری ظہور الہی شہید کے سیاسی وارث اور علمبردار ہیں۔چوہدری شجاعت حسین نے ایک بار پھر اپنے عظیم والد اور خاندان کی جمہوری روایت کو زندہ و جاوید کیا۔ان کا یہ کردار جمہوریت اور آئینی اقدار کی جیت ہے ،چوہدری شجاعت حسین، ان کے خاندان اور ساتھیوں کو خراج تحسین پیش کرتا ہوں۔ شہباز شریف نے کہا کہ سابق صدر زرداری نے آئین، جمہوریت اور عوام کے مفاد کے لئے تاریخی کردار ادا کیا ہے، سابق صدر زرداری کی سیاسی رواداری نے بحران کا خاتمہ کر دیا، سابق صدر آصف علی زرداری، مولانا فضل الرحمان، بلاول بھٹو کا شکریہ ادا کرتا ہوں، ایم کیو ایم، اے این پی، بی این پی، باپ سمیت اتحادی جماعتوں کے تمام محترم قائدین کو فردا فردا خراج تحسین پیش کرتا ہوں۔ وزیراعظم کا کہنا تھا کہ اتحادی جماعتوں کے قائدین کی سیاسی بصیرت، اتحاد اور حمایت سے جمہوریت فتح مند ہوئی، قوم آپ سب کو سلام پیش کرتی ہے۔
