عمران اب امریکا کے کاندھوں پر بیٹھ کر اقتدار حاصل کرنا چاہتے ہیں: خواجہ آصف
شیئر کریں
لندن :وزیر دفاع خواجہ آصف نے کہا ہے کہ عمران خان اسٹیبلشمنٹ کا پراڈکٹ تھا اور اب وہ امریکا کے کاندھوں پر بیٹھ کر اقتدار میں آنا چاہتے ہیں، اگر کوئی بیرونی ہاتھ پی ٹی آئی کی مدد کو آیا تو پاکستان اپنی حفاظت کرے گا۔
پریس کانفرنس کرتے ہوئے خواجہ آصف نے کہا کہ 9 مئی میں سب سے بڑی رکاوٹ تھی جبکہ اس حساس معاملے پر فوری فیصلوں کی ضرورت تھی کیونکہ 9 مئی کو حساس مقامات پر حملے کیے گئے۔
انہوں نے کہا کہ ہندوستان میں بھی ایسی للکار نہیں ہوئی، منصوبہ بندی اور پلاننگ سے پاکستان میں بہت سی جگہ پر دفاعی تنصیبات پر حملے کیے گئے، ہجوم تربیت یافتہ تھا، عمران خان اور دیگر کا مطالبہ تھا کہ ویڈیو ریلیز کریں اب ہوگئیں۔وزیر دفاع نے کہا کہ جن 25 لوگوں کو سزائیں ہوئیں ان کے چہرے اب سامنے آگئے ہیں، اب بہت سے کیسز باقی ہیں ان کے بھی جلد فیصلے آئیں گے۔
انہوں نے کہا کہ ملٹری کورٹ سے نو مئی کے مجرموں کو سزا پاکستان کیلئے ایک سنگ میل ہے جس کو ہم عبور کررہے اور سیاست کو ان عناصر سے پاک کررہے ہیں جو پاکستان کو اپنی سیاست کی بھینٹ چڑھا سکتے ہیں۔
خواجہ آصف نے کہا کہ ساری قوم کیلئے لمحہ فکریہ ہے کہ سیاسی معاملات یا تحفظات پر قومی یا وطن کے دفاع کو چیلنج کرنے کا معاملہ کبھی دنیا کی تاریخ میں پیش نہیں آیا۔انہوں نے کہا کہ عمران خان اسٹیبلشمنٹ کا آدمی تھا اور اس کی پوری تاریخ ہے، جنرل باجوہ نے مائنس نواز شریف پر کام کرتے رہے ہیں، مجھ سے بھی اس معاملے پر رابطہ کیا گیا اور میں نے اجازت کے بعد ملاقات بھی کی تھی۔
وزیر دفاع نے کہا کہ اس وقت کی اسٹیبلشمنٹ نے منصوبہ بنایا تھا کہ نواز شریف کو مائنس کر کے عمران خان کو لایا جائے، جب عمران خان کو آر ٹی ایس بیٹھا کر اقتدار میں لایا گیا تو عمران حکومت میں ہزاروں اور اربوں روپے کی کرپشن ہوئی۔ عمران خان، اہل خانہ، ارد گرد کے لوگ کرپشن میں ملوث ہیں۔
انہوں نے کہا کہ چند روز پہلے تک عمران خان اسٹیبلشمنٹ سے مذاکرات چاہتے تھے، اب وہ کمیٹی کمیٹی کھیل رہے ہیں اور قومی اسمبلی میں چیخ رہے ہیں، یہ تبدیلیاں کیوں آرہی ہیں عوام کو نظر آرہاہے۔وزیر دفاع خواجہ آصف نے کہا کہ ایٹمی دھماکوں کے وقت اگر عمران خان ہوتا تو 5 ارب ڈالر جیب میں رکھ لیتا اور ملک کا سودا کردیتا۔
