ظلم کے نظام کے خلاف جہاد سب کی ذمہ داری ہے، عمران خان
شیئر کریں
بانی پی ٹی آئی عمران خان نے اپنی ہمشیرہ علیمہ خانم سے گفتگو کرتے ہوئے کہا ہے کہ جو ججز پاکستان میں انصاف دینے کی کوشش کر رہے تھے ان کو یہ او ایس ڈی بنا رہے ہیں، جو ججز پاکستان میں ناجائز، غیرآئینی اورغیرقانونی فیصلے دے رہے تھے ان کو اب یہ ترقی دے رہے ہیں۔ علیمہ خانم کے مطابق اگر 190ملین پاؤنڈ میں سزا ہوئی تو ہائی کورٹ میں اپیل دائر کریں گے اور یہ پکا ہے کہ بانی مزید تین چار مہینے قید میں رہیں گے ۔اڈیالہ جیل کے باہر میڈیا سے گفتگو میں بانی پی ٹی آئی کی بہن علیمہ خانم نے کہا کہ بانی پی ٹی آئی نے ملاقات میں کہا ہے کہ 26 ویں آئینی ترمیم کے ذریعے عدلیہ کو قبضہ میں لینے کا آغاز کر دیا ہے۔انہوں نے کہا کہ عدلیہ کو پیغام دیا جا رہا ہے کہ آپ ہمارے مطابق فیصلے دیں گے تو ترقی ملے گی، اگر آپ نے پاکستانیوں کو انصاف دینے کی کوشش کی تو آپ کو ہٹا دیا جائے گا یا او ایس ڈی بنا دیا جائے گا۔ع لیمہ خانم نے کہا کہ بانی پی ٹی آئی کہتے ہیں کہ جو لوگ حق کے ساتھ کھڑے ہیں لوگ ان کو پہچان رہے ہیں، ہم سب کی ذمہ داری بنتی ہے کہ اس ظلم کے نظام کے خلاف جہاد کریں۔ ان کا کہنا تھا کہ بانی پی ٹی آئی نے کہا ہے کہ مجھے پورا یقین ہے کہ یہ القادر ٹرسٹ کیس میں سزا سنائیں گے ، ٹرائل کورٹ سے جب سزاؤں کے فیصلے ہوتے ہیں تو ہائی کورٹ سے ریلیف مل جاتا ہے ،القادر ٹرسٹ ریفرنس ایک احمقانہ کیس ہے کہ بانی نے چیریٹی کا پراجیکٹ کیوں لگایا۔انہوں نے کہا کہ یہ ریفرنس بھی ہائی کورٹ جا کر ختم ہو جائے گا، بانی پی ٹی آئی کہتے ہیں کہ ہمارے کارکنان پر مزید مقدمات سے حکومت کی نیت سمجھ آ رہی ہے اور واضح ہو گیا ہے کہ ان کی نیت بالکل نہیں ہے کہ یہ بات چیت کریں۔علیمہ خان کے مطابق عمران خان نے کہا کہ ان کی نیت یہی ہے کہ یہ سب کو قید میں رکھیں۔انہوں نے کہا کہ مطالبہ کرتے ہیں کہ ہمارے ناحق قید میں رکھے گئے کارکنان کو رہا کیا جائے ، دوسرا مطالبہ ہے کہ 9 مئی اور 26 نومبر کے حوالے سے جوڈیشل کمیشن سے تحقیقات کروائی جائیں۔ بانی پی ٹی آئی کی ہمشیرہ علیمہ خانم کے مطابق عمران خان نے کہا ہے کہ حکومت کا کمیشن بنانے کا ارادہ نہیں، (آج) سے ترسیلات زر نہ بھیجنے کی کال پرعمل کیا جائے ۔علیمہ خانم نے کہا کہ اگر 2مطالبات مان لئے گئے تو زر مبادلہ نہ بھیجنے کی کال واپس لے لیں گے ۔
