کورونا ،شدید خطرات میں عوام کی زندگیوں کو داؤ پر لگانا سیاسی سفاکی ہے ، وزیر اطلاعات
شیئر کریں
وفاقی وزیر اطلاعات سینیٹر شبلی فراز نے کہا ہے کہ کورونا کے شدید خطرات میں عوام کی زندگیوں کو داؤ پر لگانا سیاسی سفاکی اور ظلم ہے ۔ اپنے بیان میں وفاقی وزیر نے کہا کہ معمولی سیاسی فائدے کیلئے بے گناہ انسانوں اور کارکنان کی زندگیوں سے کھیلنا مفاد پرست سیاسی ٹولے کی ذہنیت بے نقاب کرتا ہے ۔ سینیٹر شبلی فراز نے کہاکہ ملکی اداروں کو بدنام اور معیشت تباہ کرنے والے مجرم اب عوام کی صحت اور روزگار کے درپے ہیں۔ وفاقی وزیر اطلاعات نے کہاکہ یہ اپنے غیر ذمہ دارانہ رویے سے عوامی صحت اور روزگار دونوں متاثر کرنا چاہتے ہیں،کرپشن کے کورونا سے عوام حساب لیں گے ۔ انہوںنے نکہاکہ عدالتی احکامات کے بعد جلسوں کا انعقاد قانون کی دھجیاں اڑانے کے مترادف ہے ۔ وفاقی وزیر اطلاعات نے کہاکہ پیمرا کو ایسی غیر قانونی اور عوام کی صحت کے لیے خطرناک سرگرمی کو نشر کرنے کی اجازت نہیں دینی چاہیے ۔ انہوںنے کہاکہ عوام کی صحت اور تحفظ ہماری اولین ترجیح ہے ۔
