قرآنِ کریم کی بے حرمتی، عراق میں سوئیڈن کا سفارتخانہ جلا دیا گیا
شیئر کریں
سوئیڈن میں قرآن کی بے حرمتی پر عراق کے دارالحکومت بغداد میں سینکڑوں مشتعل افراد نے سوئیڈن کے سفارت خانے پر دھاوا بول کر اسے جلا دیا۔غیرملکی خبررساں ادارے کے مطابق مشتعل مظاہرین نے وسطی بغداد میں سوئیڈن کے سفارت خانے پر دھاوا بول دیا، کمپاؤنڈ کی دیواروں کو توڑ کر سفارت خانے کو آگ لگا دی۔ سوئیڈن کے سفارت خانے پر حملہ عراقی رہنما مقتدی الصدر کے حامیوں نے کیا۔ سوئیڈن کی وزارتِ خارجہ کی جانب سے جاری کیے گئے بیان میں کہا گیا ہے کہ سفارت خانے کا تمام عملہ محفوظ ہے۔ وزارتِ خارجہ سوئیڈن کا کہنا تھا کہ سفارت خانے پر حملے کی مذمت کرتے ہیں اور عراقی حکام سفارتی عملے اور مشن کی حفاظت کے ذمے دار ہیں۔ دوسری جانب عراق کی وزارتِ خارجہ نے بھی سوئیڈن کے سفارت خانے پر حملے کی شدید مذمت کی۔عراق میں مشتعل افراد کی جانب سے یہ مظاہرہ سوئیڈن میں ایک اور قرآن کی بے حرمتی کی اجازت دیے جانے پر کیا گیا ہے۔
