وزیر اعظم کا لڑکی پر ہجوم کے حملے کا نوٹس ، ملزمان کی فوری گرفتاری کا حکم
شیئر کریں
وزیراعظم عمران خان نے مینار پاکستان میں یوٹیوبر لڑکی پر ہجوم کے حملے اور ہراسانی کے افسوس ناک واقعہ پر آئی جی پنجاب انعام غنی سے رابطہ کرکے ملزمان کی فوری گرفتاری کا حکم دیا ہے ۔پی ٹی آئی رہنما زلفی بخاری نے ٹویٹ کرتے ہوئے بتایا کہ لاہور میں پیش آئے واقعے پر وزیراعظم عمران خان نے آئی جی پنجاب سے رابطہ کیا۔ آئی جی پنجاب نے وزیر اعظم عمران خان کو واقعے کی تفصیلات سے آگاہ کیا۔ پولیس خاتون یوٹیوبر پر حملے اور قلعہ لاہور میں رنجیت سنگھ کے مجسمے کو نقصان پہنچانے والے مجرموں کو پکڑ رہی ہے۔زلفی بخاری نے کہا کہ یہ واقعات قانون اور سماجی اصولوں کی سنگین خلاف ورزیاں ہیں، حکومت ان واقعات میں ملوث کسی ایک فرد کو بھی نہیں چھوڑے گی۔وفاقی وزیر انسانی حقوق شیریں مزاری نے گریٹر اقبال پارک واقعہ کی مذمت کرتے ہوئے کہا کہ واقعہ میں ملوث افراد کیخلاف ایف آئی آردرج ہوگئی، پنجاب حکومت معاملے پر سخت کارروائی یقینی بنائے گی۔وزیراعظم عمران خان کے معاونِ خصوصی برائے سیاسی روابط شہباز گل نے کہا کہ بہت جلد گریٹر اقبال پارک مینار پاکستان کے واقعہ میں ملوث ملزمان کو پولیس گرفتار کر کے سخت ترین کارروائی کرے گی، پولیس وڈیوز کی مدد سے ملزمان کی شناخت کر رہی ہے، یہ وہ رویے ہیں جن پر پورے معاشرے نے مل کر کام کرنا ہے، سیاستدانوں ، میڈیا صحافیوں ، اساتذہ اور والدین سب کو اپنا کردار ادا کرنا ہے۔
