نیب قانون میں تبدیلی،متعدد اہم مقدمات ختم شہبازشریف، حمزہ ودیگر کیخلاف ریفرنسز واپس
شیئر کریں
وزیراعظم ،حمزہ رمضان شوگر ملز ،راجا پرویز اشرف رینٹل پاور،گیلانی کیخلاف یو ایس ایف فنڈ میں کرپشن کے ریفرنس واپس لے لیا گیا
سینیٹر سلیم مانڈوی والا،سردار مہتاب عباسی سینیٹر روبینہ خالد کے خلاف بھی لوک ورثہ میں مبینہ خرد برد کا ریفرنس بھی واپس لے لیا گیا ہے
اسلام آباد (بیورورپورٹ) قومی احتساب بیورو (نیب) کے قوانین میں ترمیم کے تحت نیب ریفرنسز کے ملزمان کو بڑا ریلیف مل گیا، متعدد اہم مقدمات ختم اور کرپشن ریفرنس واپس ہو گئے۔نیب قوانین میں تبدیلی کے بعد وزیراعظم شہباز شریف، حمزہ شہباز، راجا پرویز اشرف اور یوسف رضا گیلانی کے خلاف عائد الزامات سمیت 50 کرپشن ریفرنسز احتساب عدالتوں نے واپس کر دئیے ہیں۔وزیراعظم شہباز شریف اور حمزہ شہباز کے خلاف رمضان شوگر ملز ریفرنس واپس ہو گیا جبکہ سپیکر قومی اسمبلی راجا پرویز اشرف کے خلاف رینٹل پاور کے 6 کرپشن ریفرنسز واپس لے لیے گئے ہیں۔اسی طرح پیپلز پارٹی کے سینیٹر اور سابق وزیراعظم یوسف رضا گیلانی کے خلاف یو ایس ایف فنڈ میں کرپشن کا ریفرنس واپس لے لیا گیا ہے۔اس کے علاوہ سینیٹر سلیم مانڈوی والا، سابق وزیراعلیٰ خیبر پختونخوا سردار مہتاب عباسی اور پیپلز پارٹی کی سینیٹر روبینہ خالد کے خلاف لوک ورثہ میں مبینہ خرد برد کا ریفرنس بھی واپس لے لیا گیا ہے۔نیب قوانین میں ترمیم کے بعد مضاربہ سکینڈل اور کمپنیز فراڈ کے ریفرنسز بھی احتساب عدالتوں سے واپس لے لیے گئے ہیں۔
