وزیراعلیٰ بلوچستان کے خلاف تحریک عدم اعتماد جمع کروا دی گئی
شیئر کریں
وزیراعلیٰ بلوچستان میرعبدالقدوس بزنجو کے خلاف تحریک عدم اعتماد جمع کروا دی گئی، تحریک عدم اعتماد بلوچستان عوامی پارٹی، پی ٹی آئی، عوامی نیشنل پارٹی کے 14 ارکان کے دستخطوں سے جمع کروائی گئی ہے، تفصیلات کے مطابق بدھ کو بلوچستان عوامی پارٹی کے صدر سابق وزیراعلیٰ بلوچستان جام کمال خان، سینئر سیاست دان سردار یار محمد رند، ارکان اسمبلی اصغر خان اچکزئی، میر سلیم کھوسہ، میر عارف جان محمد حسنی، سردار سرفراز ڈومکی بلوچستان اسمبلی پہنچے جہاں انہوں نے سیکریٹری اسمبلی کے دفتر میں آئین کے آرٹیکل136 کے تحت وزیراعلیٰ بلوچستان میرعبدالقدو س بزنجو کے خلاف تحریک عدم اعتماد کی قرارداد جمع کروائی جس میں وزیراعلیٰ کے خلاف تحریک عدم اعتماد کو منظور کر کے انہیں عہدے سے برطرف کرنے کا مطالبہ کیا گیا ہے تحریک عدم پر کل 14 ارکان نے دستخط کیے ہیں جن میں 2 صوبائی وزرا ء بی اے پی کے سینئر صوبائی وزیر نوابزادہ طارق مگسی اور پی ٹی آئی کے مبین خلجی اور ایک مشیر میر نعمت اللہ زہری شامل ہیں جبکہ بلوچستان عوامی پارٹی کے 7ارکان کے کل سات ارکان نے تحریک پر دستخط کیے ہیں جن میں جام کمال خان، میر ظہور بلیدی، نوابزادہ طارق مگسی میر عارف جان محمد حسنی، میر سلیم کھوسہ، مٹھا خان کاکڑ، سردار سرفراز ڈومکی ، پی ٹی آئی کے 4ارکان سردار یار محمد رند، میر نعمت اللہ زہری، مبین خلجی ،بی بی فریدہ رند، عوامی نیشنل پارٹی کے تین ارکان اصغر خان اچکزئی، پارلیمانی سیکرٹری ملک نعیم بازئی، پارلیمانی سیکرٹری شاہینہ کاکڑ شامل ہیں ۔اسمبلی سیکرٹریٹ میں تحریک عدم اعتماد 5 بجکر 50 منٹ پر ریسیو کی گئی جبکہ عملے نے اس پر دستخط اور مہر بھی لگائی ہے۔
