گوادر پورٹ، پاک چین تاریخی دوستی کا عظیم سفر
شیئر کریں
ریاض احمد چودھری
وزیراعلیٰپنجاب محمد شہبازشریف نے چائنا پاکستان اکنامک کوریڈور(سی پیک) کے تحت گوادر بندرگاہ سے پہلے تجارتی قافلے کی روانگی کے تاریخی موقع پر پاکستانی قوم کو مبارکباد دیتے ہوئے کہا ہے کہ آج کا دن پاک چین دوستی کے حوالے سے ایک عظیم دن ہے۔گوادر بندرگاہ سے پہلے تجارتی قافلے کی روانگی سے پاکستان اور چین کی تاریخی دوستی کے عظیم سفر کا ایک اور سنگ میل عبور کیا گیا ہے اور آج گیم چینجر پاک چین اقتصادی راہداری کا خواب حقیقت بن گیا ہے۔ آج ایک نئی تاریخ رقم ہوئی ہے جس کا خواب 20کروڑ پاکستانی عوام نے دیکھا تھا۔
وزیراعلیٰ نے چین کے صدر شی جن پنگ، وزیراعظم لی کی چیانگ، کیمونسٹ پارٹی آف چائنا کی قیادت اور چینی عوام کو بھی تاریخی دن کے موقع پر مبارکباد دیتے ہوئے کہاکہ گوادر بندرگاہ سے تجارتی بحری جہازوں کی روانگی پاک چین دوستی کی ایک اور زندہ و تابندہ مثال ہے اور پاکستانی قوم اس ضمن میں چین کے بے پایاں تعاون کی شکرگزار ہے۔ پاکستان کے 20کروڑ عوام چین کے صدر کی جانب سے چائنا پاکستان اکنامک کوریڈور کے عظیم الشان سرمایہ کاری پیکیج کو کبھی فراموش نہیں کرسکتے۔
سی پیک کے تحت پنجاب سمیت پاکستان بھر میں منصوبوں پر تیز رفتاری سے کام جاری ہے اور چین کا یہ تاریخ ساز سرمایہ کاری پیکیج پاک چین معاشی تعاون کو مزید فروغ دے گا۔ چائنا پاکستان اکنامک کوریڈورکے منصوبوں سے پاکستان ہی نہیں بلکہ خطے کے دیگر ممالک بھی استفادہ کریںگے اورخطے میں معاشی و تجارتی سرگرمیاں فروغ پائیں گی۔ پاکستان اور چین انمٹ رشتوں میں بندھے ہوئے ہیں۔ پاکستان اور چین کی دوستی شہد سے میٹھی، ہمالیہ سے بلند، سمندر سے گہری اور فولاد سے زیادہ مضبوط ہے اور گوادربندرگاہ سے تجارتی قافلوں کی روانگی سے اس بات پر ایک بار پھر مہر تصدیق ثبت ہوئی ہے۔ چین نے پاکستان کی تقدیر بدلنے کیلیے تاریخ ساز اقتصادی پیکیج دیا ہے، جس پر پوری پاکستانی قوم چینی قیادت اور عوام کی ممنون ہے۔ ہماری آئندہ نسلیں بھی چین کی اس فراخدلی، مشکل وقت میں ہاتھ تھامنے اور اربوں ڈالر کی سرمایہ کاری کو کبھی فراموش نہیں کرپائیں گی۔ چین پاکستان کا ایک ایسا مخلص اور بااعتماد دوست ہے جومصیبت کی ہر گھڑی میں پاکستان کے ساتھ کھڑا رہا۔
سی پیک کے عظیم اور تاریخی منصوبے سے ہمارے دوست بے پناہ خوش ہیں جبکہ دشمن کو ترقی و خوشحالی کے اس عظیم پیکیج پربہت تکلیف ہے لیکن پاکستانی قوم اتحاد اور اتفاق کی قوت سے سی پیک کیخلاف دشمن کی سازش کسی صورت کامیاب نہیں ہونے دے گی۔ چائنا پاکستان اکنامک کوریڈور کے سفر کی یہ عظیم شروعات ہے اور ترقی اور خوشحالی کے طویل سفر کا یہ نقطہ آغاز ہے۔ سی پیک سے پاکستان سمیت پورے خطے کی قسمت بدل جائے گی۔ یہ منصوبہ پاکستان کو معاشی لحاظ سے مضبوط بنانے میں کلیدی کردار اداکرے گا۔
سی پیک ایک خطہ، ایک سڑک اور ویژن کا عکاس ہے۔ یہ علاقے میں امن و سلامتی لائے گا۔ نئے مواقع اور راہیں نکلیں گی جو پاکستان کو ترقی کی جانب لے کر جائیں گی۔ گوادر اقتصادی راہداری منصوبے کے سر کا تاج ہے۔ سی پیک کے تمام منصوبوں پر عملدرآمد ہو رہا ہے۔شہباز شریف نے مزید کہا کہ گوادر اقتصادی حب بننے جا رہا ہے اور سی پیک سے پاکستان کے علاوہ پورا خطہ مستفید ہو گا۔ گوادر میں ووکیشنل انسٹیٹیوٹ اور یونیورسٹی بنے گی۔
راہداری سے اقتصادی و سماجی ترقی کا نیا دور شروع ہوگا اس راہداری سے پاکستان تجارتی معاشی سرگرمیوں کا مرکز بن جائے گا۔ بلوچستان میں 74 ارب روپے کی لاگت کے منصوبوں پر کام جاری ہے۔ صرف پاکستان اور چین ہی نہیں پورے خطے میں تجارت کے راستے کھل جائیں گے۔
٭٭
