سندھ اور بلوچستان اسمبلی کی 3 نشستوں پر ضمنی انتخاب کے لیے پولنگ
شیئر کریں
سندھ اور بلوچستان اسمبلی کی 3 نشستوں پر ضمنی انتخاب کے لئے پولنگ کا عمل جاری ہے ۔سندھ اسمبلی کی 2 جب کہ بلوچستان اسمبلی کی ایک نشست پر ضمنی انتخاب کے لیے پولنگ کا عمل جاری ہے جو کہ شام 5 بجے تک بلا تعطل جاری رہے گا۔ امیدواروں کی جانب سے کئی پولنگ اسٹیشنز پر ووٹنگ کا عمل سست ہونے کے الزام لگائے جارہے ہیں جبکہ کراچی میں حالات کشیدہ بتائے جارہے ہیں۔
پی ایس 88 ملیر 2
۔۔۔۔۔۔۔۔۔۔
کراچی میں سندھ اسمبلی کے حلقہ پی ایس 88 ملیر 2 گلستان جوہر، ائیر پورٹ، سچل، ملیر سٹی، ملیر کینٹ اور میمن گوٹھ سمیت اطراف کے علاقوں پر مشتمل ہے ، اس حلقے میں رجسٹرڈ ووٹرز کی تعداد ایک لاکھ 45 ہزار 627 ہے ، یہ نشست پیپلز پارٹی کے غلام مرتضیٰ بلوچ کے انتقال پرخالی ہوئی تھی۔ اس نشست پر پیپلز پارٹی کے یوسف بلوچ، پی ٹی آئی کے جان شیر جونیجو اور ایم کیو ایم کے ساجد احمد سمیت دیگر آزاد امیدوار میدان میں ہیں تاہم اصل مقابلہ پیپلز پارٹی اور ایم کیو ایم کے درمیان ہے ۔
پی ایس 43 سانگھڑ
۔۔۔۔۔۔۔۔۔۔
سندھ اسمبلی کے حلقہ پی ایس 43 میں ووٹرز کی کل تعداد ایک لاکھ 57 ہزار 210 ہے ، یہ نشست پیپلز پارٹی کے جام مدد علی کے انتقال پر خالی ہوئی تھی، اس نشست پر ہونے والے ضمنی انتخاب میں مجموعی طور پر 7 امیدوار حصہ لے رہے ہیں تاہم اصل مقابلہ پیپلز پارٹی کے جام شبیر علی اور پی ٹی آئی کے مشتاق جونیجو کے درمیان ہیں۔
پی بی 20 پشین
۔۔۔۔۔۔۔۔۔
2018 کے عام انتخابات میں بلوچستان اسمبلی کے حلقہ پی بی 20 پشین 3 سے جے یو آئی (ف) کے سید فضل آغا منتخب ہوئے تھے تاہم ان کے انتقال کے باعث یہ نشست خالی ہوئی تھی۔ جے یوآئی (ف) کے امیدوار سید عزیز اللہ آغا اور حکمران جماعت بلوچستان عوامی پارٹی کے امیدوار عصمت اللہ ترین کے مابین سخت مقابلہ متوقع ہے ۔
