پی ٹی آئی کور کمیٹی کے تحفظات ،بشریٰ بی بی کی زندگی کو خطرات لاحق
شیئر کریں
پی ٹی آئی کور کمیٹی نے بشریٰ بی بی کی زندگی کو لاحق خطرات پر تحفظات کا اظہار کردیا۔پاکستان تحریک انصاف (پی ٹی آئی) کی کور کمیٹی اجلاس کا اعلامیہ جاری کردیا گیا۔اعلامیے کے مطابق کور کمیٹی نے عمران خان کی اہلیہ کو ان کی مرضی کے خلاف بنی گالہ میں قید رکھنے کی مذمت کرتے ہوئے بشریٰ بی بی کی صحت اور زندگی کو لاحق خطرات پر تحفظات کا اظہار کیا۔کور کمیٹی اجلاس میں عمران خان کے مقدمات پر قانونی ٹیم نے کور کمیٹی کو تفصیلی بریفنگ دی، عمران خان کو پابند سلاسل رکھنے کی مذمت بھی کی گئی۔اعلامیہ کے مطابق کور کمیٹی نے کہا کہ عمران خان کو انتقام کا نشانہ بنانے کے عزائم بے نقاب ہوچکے ہیں، سزاؤں کے خلاف اپیلوں کو بلا جواز تاخیری حربوں کی نذر کیا جا رہا ہے ۔ عمران خان کے مقدمات کی کارروائی قانونی تقاضوں کے تحت آگے بڑھائی جائے ۔اجلاس میں عمران خان کی اہلیہ کو ان کی مرضی کے خلاف بنی گالہ میں قید رکھنے کی مذمت کی گئی، کور کمیٹی نے بشریٰ بی بی کو فول پروف سیکیورٹی اور صحت کی سہولیات فراہمی کا مطالبہ کیا۔کور کمیٹی نے کہا کہ پنجاب کے مختلف حلقوں میں ووٹوں کی دوبارہ گنتی کا عمل غیر آئینی ہے ، عوام کے مینڈیٹ پر ڈاکہ ڈال کر نشستیں ن لیگ کو دی جارہی ہیں، فارم 45 کی روشنی میں تمام حلقوں کا آڈٹ کیا جائے ۔اعلامیے کے مطابق کور کمیٹی نے کہا کہ تحریک انصاف کی تمام نشستیں آئین و قانون کے مطابق واپس کی جائیں۔
