کراچی میں مہنگائی کا جن بے قابو،پھل غریب کیلئے خواب بن گئے
شیئر کریں
کراچی ماہ صیام میں مہنگائی کا جادو سر چڑھ کر بولنے لگا، مہنگائی کی چکی میں پسے عوام کیلئے پھل کھانا خواب بننے لگا۔سرکاری ریٹ لسٹ میں 2 پھل مزید مہنگے ہوگئے جبکہ مارکیٹ میں پھل سرکاری نرخوں کے برعکس مزید مہنگے داموں فروخت ہونے لگے۔ریٹ لسٹ کے مطابق سیب کالا کولو کی سرکاری قیمت 325 روپے کلو مقرر کی گئی ہے جبکہ مارکیٹ میں درجہ اول سیب 400 روپے کلو تک فروخت کئے جا رہے ہیں۔درجہ اول کیلے کی قیمت 5 روپے بڑھا کر سرکاری ریٹ لسٹ میں 190 روپے درجن مقرر کی گئی جبکہ مارکیٹ میں درجہ اول کیلے کی فروخت 250 روپے فی درجن تک ہو رہی ہے جبکہ کیلا درجہ دوم سرکاری قیمت 130 روپے کے برعکس 180 روپے فی درجن بیچا جا رہا ہے۔اسی طرح انار بدانہ سرکاری ریٹ لسٹ کے 690 روپے کے برعکس 1000 روپے کلو تک فروخت کیا جا رہا، سرکاری ریٹ لسٹ میں امرود 30 روپے مہنگا کر کے 190 روپے کر دیا گیا جبکہ بازار میں 250 روپے کلوتک فروخت ہو رہا ہے۔کنو کی سرکاری ریٹ لسٹ میں قیمت 295 روپے درجن مقرر ہے لیکن مارکیٹ میں 400 روپے تک وصول کی جا رہی ہے، پپیتا سرکاری ریٹ 230 روپے کے برعکس مارکیٹ میں 300 روپے تک فروخت کیا جا رہا ہے۔سرکاری ریٹ لسٹ میں کھجور ایرانی 510 روپے ہے جبکہ اوپن مارکیٹ میں 620 روپے کلو تک فروخت ہونے لگی ہے۔
