سندھ بلڈنگ ،کھوڑو سسٹم کے کماؤ پوت جلیس صدیقی اور عبدالسجاد خان دھندوں میں مگن
شیئر کریں
رہائشی پلاٹوں پر کمرشل تعمیرات کے اضافی پیسے طلب کئے جانے لگے ،ناجائز تعمیرات میں تیزی
ناظم آباد نمبر 1پلاٹ K2 اور گلبہار رضویہ سوسائٹی پلاٹ C4پر خلاف ضابطہ تعمیرات جاری
ڈی جی سندھ بلڈنگ اسحاق کھوڑو سے موقف لینے کی باربا رکوشش ، کسی رابطے کا جواب نہیں دیا
سندھ بلڈنگ کنٹرول اتھارٹی میں وسطی پر قابض کھوڑو سسٹم کے کماؤ پوت ڈائریکٹر جلیس احمد صدیقی اور کینیڈین شہریت کے حامل ڈائریکٹر ڈیمالیشن عبدالسجاد خان نے وسطی میں غیر قانونی تعمیرات کروانے والی مافیا سے گٹھ جوڑ کرنے کے بعد رہائشی پلاٹوں پر کمرشل تعمیرات کا اجازت نامہ دینے کے نام پر خطیر رقوم بٹورنے کا سلسلہ شروع کر رکھا ہے اور ڈی جی سندھ بلڈنگ اسحاق کھوڑو سب اچھا ہے کی بانسری بجا رہے ہیں۔ اطلاعات کے مطابق ڈائریکٹر جلیس احمد صدیقی اور ڈائریکٹر ڈیمالشن عبدالسجاد خان نے بیٹر مافیا کو اعتماد میں لینے کے بعد ناظم آباد میں رہائشی پلاٹوں پر کمرشل پورشن یونٹ کی تعمیرات شروع کروا رکھی ہیں ۔غیرقانونی تعمیرات کے خاتمے کے لئے گزشتہ دنوں تشکیل دی جانے والی کمیٹی کے سربراہ سمجھے جانے والے ڈپٹی کمشنر وسطی طحہ سلیم نے بھی سندھ بلڈنگ کنٹرول اتھارٹی کی سیاسی سرپرستی میں پلنے والے افسران کی سرپرستی میں ہونے والی غیرقانونی تعمیرات کے خلاف مکمل طور پر پراسرار خاموشی اختیار کر رکھی ہے ناظم آباد نمبر 1بلاک K پلاٹ نمبر 2 الیاس مارکیٹ میں رہائشی پلاٹ پر کمرشل دکانیں فیصل بینک اور کمرشل پلازہ کی تعمیر دن کے اجالے میں کی جا رہی ہے ۔پلاٹ C4 رضویہ سوسائٹی گولیمار میں روڈ پر غیرقانونی تعمیرات کا آغاز کروا کر سندھ کی اعلیٰ شخصیات کے نام پر خطیر رقوم وصول کرنے کا سلسلہ جاری ہے ۔جاری تعمیرات میں ہنگامی اخراج کی سنگین خلاف ورزیاں موجود ہیں اور انسانی جانوں کو شدید خطرات لاحق ہیں ۔وسطی میں جاری قانونی دھندوں کی نشاندہی کے باوجود بااثر بدعنوان افسران احتسابی عمل سے بالا تر ہیں ۔ اس ضمن میں ڈی جی اسحاق کھوڑو سے موقف لینے کے لیے بارہا کوشش کی گئی مگر موصوف نے کسی بھی رابطے کا جواب نہیں دیا۔
