نگراں وزیراعلیٰ سندھ کے نام پر مراد علی شاہ اور رعنا انصار میں اتفاق نہ ہو سکا
جرات ڈیسک
هفته, ۱۲ اگست ۲۰۲۳
شیئر کریں
سندھ میں نگراں وزیراعلیٰ کی تقرری سے متعلق مشاورت کے لیے ہونے والی ملاقات بے نتیجہ ختم ہوگئی۔ نگراں وزیراعلیٰ کے لیے نام پر مشاورت کے لیے اپوزیشن لیڈر رعنا انصار اور ایم کیو ایم کے رہنما علی خورشیدی وزیراعلیٰ ہاؤس پہنچے تھے۔ ذرائع کے مطابق کراچی میں وزیراعلیٰ ہاؤس میں رعنا انصار اور مراد علی شاہ کے درمیان ہونے والی ملاقات میں دونوں جانب سے نگراں وزیراعلیٰ کے لیے فی الحال کوئی نام زیرِ غور نہیں لایا گیا۔ ذرائع کا کہنا ہے کہ وزیراعلی سندھ کے ہمراہ ناصر شاہ بھی مشاورت میں شامل تھے اور اس دوران دونوں جانب سے طے کیا گیا کہ قیادت سے مشاورت کے بعد نام پیش کیے جائیں گے۔ اس حوالے سے ذرائع کا کہنا ہے کہ اپوزیشن لیڈر رعنا انصار اور وزیراعلیٰ سندھ کے درمیان اتوار کو پھر ملاقات ہوگی۔
